بعض الأنباء فيما ذكر عن اثار الأنبياء

بسم الله الرحمن الرحيم

 ملحوظة

 المقالة دي هى عبارة عن رأي شخصى مزود بالمصادر العلمية من كتب التاريخ و مقالات الأنترنت ... انا منقلتهوش من حد دى مقالة انا كاتبها بنفسى ... و هذا العمل اشبه ما يكون ببوستات الفيسبوك اللى انا كنت بكتبها و لكن على اكبر شوية ... فهتلاحظوا كثير من العامية يا حضرات ... الحاجات دى قابلة للنقاش طبعا و يا ريت لو حد يناقشنى فيها و يزود عليا او يقولى غلطى فيها ... طبعا بأسلوب علمى بالأدلة يا ريت او يستفسر منى عن تفاصيل اكبر فى اى نقطة هو عايزها ... لأن المقالات اللى من النوع ده هي برضه سرد للى انا بتعلمه مع نفسى من علم التاريخ و هكون سعيد جدا لو حصل ان حد طلب انه نتعلم سويا و نتناقش مناقشة كاملة على الجروب عندى فى الفيسبوك ... و ده احد اهم الاهداف الكبيرة ليا من المدونة و الفيسبوك و هو انى ازود معرفتى فى التاريخ بالذات بكثير من المناقشة 

جروبى على فيسبوك

https://www.facebook.com/groups/Esterlab2017/ 

.....................................................................................................................................................................

طبعا كلنا قرأنا فى يوم من الأيام الأخبار الغريبة اللى بتخص اشخاص معينين و ليسوا بشخصيات تاريخية قديمة بل احيانا بيكونوا عايشين معانا و لسه مماتوش و مقتنياتهم الشخصية بتتباع بأعلى الأسعار ... لأن ببساطة صاحب الحاجه مشهور ... و فى من الناس المشهورة اللى بيمضى اوتوجرافات و بيبقى توقيعه مهم للناس اللى بتحب الهواية دى و على المدى الطويل لو تم الأحتفاظ بيه بيكون وثيقة تاريخية ههههه ... صحيح حاجتى و حاجاتك لو فضلت من دلوقتى ل200 سنة هيبقى اسمها اسمها اثار ... و كل ما تقدم كل ما تزيد قيمتها ... فما بالك لو كانت بتاعت حد مشهور ... و الأمثلة كتيرة و من باب الغرابة لو جبت دليل على كلامى لأن دى حاجه الناس كلها عارفاها ...

طب ازاى مع كل الحاجات دى لأشخاص عاديين جدا او مشاهير فى ايامنا دى او ايام قديمة تكون حاجاتهم اثرية و مهمة و الأنبياء - عليهم السلام - تبقى مقتنياتهم الشخصية و ما تركوه مش حاجه عزيزة و غالية ؟؟ ... مقتنيات الأنبياء و المرسلين -عليهم السلام- مهمة جدا و ده مش فى الدين الأسلامى بس و انما فى اى دين و انا هنا بتكلم عن اتباع الديانات الابراهيمية مش الاسلام بس ... فمقصدش هنا اصحاب الديانات التانية زى البوذية و الزراديشتية مثلا او حتى الاتونية اللى اثارها و ما تبقى منها و من مثيلتها كعبادة امون و غيرها  لأن دى بتعامل معاملة الاثار العادية هذه الأيام لأن اصحاب الديانات دى اختفوا و بالتالى دى اصبحت ديانات ميتة ... اما الباقى كعبادة الشمس و الكواكب و النار و ما شابه من اى نوع من الأنواع ليس مقصود فى هذا المقال ... انا هنا بتكلم عن حاجات بيعتقد مثلا انها بترجع لسيدنا موسى لسيدنا ابراهيم لسيدنا عيسى أو سيدنا محمد - عليهم جميعا الصلاة و السلام - دى هى اللى تهمنا فى هذا المقال ... 

احد اشهر الاثار مثلا اللى ذكرت فى القران الكريم تابوت بنى اسرائيل ... 

قال تعالى فى سورة البقرة  الاية 248 :

وَقَالَ لَهُمْ نَبِيُّهُمْ إِنَّ آيَةَ مُلْكِهِ أَن يَأْتِيَكُمُ التَّابُوتُ فِيهِ سَكِينَةٌ مِّن رَّبِّكُمْ وَبَقِيَّةٌ مِّمَّا تَرَكَ آلُ مُوسَىٰ وَآلُ هَارُونَ تَحْمِلُهُ الْمَلَائِكَةُ ۚ إِنَّ فِي ذَٰلِكَ لَآيَةً لَّكُمْ إِن كُنتُم مُّؤْمِنِينَ

هنا ربنا سبحانه و تعالى ذكر فى القصة دى تابوت بنى اسرائيل ... تابوت بنى اسرائيل و معروف حسب ما فهمت بتابوت العهد عند اليهود او تابوت الشهادة احيانا اخرى عند النصارى ... تابوت بنى اسرائيل اللى ذكر فى القران هنا نقلا عن ما وجدت من الشيخ الشعراوى مثلا و هو شيخ كبير و معروف بمصر و العالم الاسلامى جزاه الله خيرا و نسأل له الرحمة كان فسر الموضوع ده ...

تابوت بنى اسرائيل غالبا هو التابوت اللى اتحط فيه سيدنا موسى- عليه السلام - لما والدته قذفته فى اليم كما ذكر فى القران ... كان والدته وضعته فيه لحد ما وصل لفرعون فى قصة سيدنا موسى - عليه السلام الشهيرة - و بمرور الوقت وضع فيه عصا نبى الله موسى - عليه السلام - وجدت روايات تقول عن محتوياته الاخرى كالألواح اللى اتكتبت عليها التوراة و ملابسه و عصاه طبعا و ملابس سيدنا هارون - عليه السلام - اخو سيدنا موسى - عليه السلام - فهو تابوت كانت نفس المؤمنين من بنى اسرائيل ترتاح لرؤيته و يستبشروا بيه خيرا ... لأنه اثر النبى بكل بساطة ... فكل ما كان المسئول عن بنى اسرائيل يحس فيهم مثلا بالخوف او التردد مثلا قبل معركة كان يجلب لهم التابوت فيطمأنوا بذلك ... حاجه من ريحة النبى و الله تعالى اعلى و اعلم حسب ما بحثت ... و انصح الجميع ممن يريد الزيادة سماع الشيخ الشعراوى -رحمه الله- 

ابتدا فى الدقيقة ال8 من هذا الفيديو يتكلم عن هذا الموضوع فيديو جميل جدا بشرح الشعراوى - رحمه الله - 

فالتابوت ده كان اثار أنبياء الله تعالى موسى و هارون - عليهم السلام - ... وقال الشيخ الشعراوى - رحمه الله - اننا نستدل من هذه الأية ان الاثار اللى مقترنة بتاريخ العقيدة لابد من الحفاظ عليها و صيانتها ... و كان حتى بعض المواقع نقلت عن الشيخ الشعراوى هذا الكلام 

مقالة لموقع مصراوى

معلومات عن تابوت سيدنا موسى فى وكيبيديا من ديانات غير الاسلام 
تابوت بنى اسرائيل من مقالة وكيبيديا

و فى ناس كانت اتكلمت عن الموضوع زى الراجل الطيب ده 
و حلقة حاول فيها على قد ما يقدر الراجل يجيب معلومات من كل حتة مما هو مشهور فى هذا الموضوع 

الاثر اللى بعد كده هو مقام سيدنا نبى الله ابراهيم - عليه السلام -

و فى مقام ابراهيم - عليه السلام - بجوار الكعبة المشرفة يوجد اثر قدم النبى ابراهيم - عليه السلام - و هو الصخرة اللى موجود عليها اثر قدم نبى الله ابراهيم - عليه السلام - اللى بنى الكعبة و هو واقف عليها ...

و وردت فيه كثير من الاخبار فى الدين الاسلامى الحنيف ... و مر بالكثير من الأحداث التاريخية ... فوقت ما سرق القرامطة الحجر الأسود ارادوا كذلك سرقة المقام ... الا ان السدنة اخفوه عنهم و الله اعلم

مقالة وكيبيديا عن مقام ابراهيم - عليه السلام -
مقالة من موقع الاسلام سؤال و جواب

نبينا محمد - صلى الله عليه و سلم - معتقد ان له اثار بيننا هذه الأيام ... و لكن بعض الائمة تكذب هذه الاخبار و تقول انه - صلى الله عليه و سلم - لم يتبقى من اثاره شئ الا القران ...

منهم الشيخ محمد صالح المنجد مثلا

و لكن يبقى من اثاره - صلى الله عليه و سلم - رسائله مثلا و هى مش داخلة فى المفهوم اللى بيتكلم فيه الشيخ 

على الأقل عليها ختم رسول الله - صلى الله عليه و سلم - ليس شرطا انه كتبها بيده الشريفة و لكن ختمه عليها يكفينى شخصيا ...

قائمة لرسائل رسول الله - صلى الله عليه و سلم - من موقع العربية

 وكان الصحابة -عليهم رضوان الله- يهتمون بأثار النبى محمد - صلى الله عليه و سلم - فى الاسلام يجوز التبرك بها

حكم التبرك بأثار النبى من موقع الاسلام سؤال و جواب

و كل ما كان على جسده - صلى الله عليه و سلم - ... حتى شعره ... 

فالأخبار القديمة من الاسلام تقول : 

روى الحاكم في "المستدرك" (5299) ، والطبراني في "الكبير" (3804) ، وأبو يعلى في مسنده (7183) من طريق هُشَيْم ، ثَنَا عَبْدُ الْحَمِيدِ بْنُ جَعْفَرٍ ، عَنْ أَبِيهِ : " أَنَّ خَالِدَ بْنَ الْوَلِيدِ ، فَقَدْ قَلَنْسُوَةً لَهُ يَوْمَ الْيَرْمُوكِ فَقَالَ: اطْلُبُوهَا فَلَمْ يَجِدُوهَا، ثُمَّ طَلَبُوهَا فَوَجَدُوهَا، وَإِذَا هِيَ قَلَنْسُوَةٌ خَلِقَةٌ ، فَقَالَ خَالِدٌ: " اعْتَمَرَ رَسُولُ اللَّهِ صَلَّى اللهُ عَلَيْهِ وَسَلَّمَ فَحَلَقَ رَأْسَهُ ، وَابْتَدَرَ النَّاسُ جَوَانِبَ شَعْرِهِ ، فَسَبَقْتُهُمْ إِلَى نَاصِيَتِهِ فَجَعَلْتُهَا فِي هَذِهِ الْقَلَنْسُوَةِ ، فَلَمْ أَشْهَدْ قِتَالًا وَهِيَ مَعِي إِلَّا رُزِقْتُ النَّصْرَ " 

مصدر المعلومة من موقع الاسلام سؤال و جواب

و هذا يذكرنى شخصيا بأخبار انتصار بنى اسرائيل بعد عهد نبى الله موسى - عليه السلام - فى المعارك بأنهم كانوا يقدمون التابوت فينتصرون ... و قد ظهرت بعض المعتقدات عند اليهود انه يحتوى على قوى خارقة ... لأنهم كانوا ينتصرون كل مرة يحملون فيها التابوت معهم ... فأن صحت الاخبار فهى على علمى بركة من رب العزة تبارك و تعالى ...

و هنا نأتى لجزء الاثار اللى موجودة معانا و يقال ان الاشراف تناقلوها جيل بعد جيل ... و بعض الائمة تكذب هذه الاثار كما قلنا ... و يقولوا ان هذا ليس عليه دليل انه اثره فعلا ...

و احد الاخبار عن اثار رسول الله - صلى الله عليه و سلم - اثر قدمه الشريفة بمسجد قيتباى فى مصر ... و ان كان بعض الناس تشكك بهذا الأمر الا انه من المستغرب فى هذا العهد ان السلطان قايتباى يأتى بشئ ليس من اثار النبى و ينسبه اليه ... فى هذا الفيديو يظهر المسجد الذى يحتوى على الاثر الشريف ... مسجد قايتباى ...

و بعض المواقع فى مصر  كتبت عن هذا الموضوع
موقع صدى البلد

من الاخبار اللى لقيتها و الله تعالى اعلى و اعلم بصحتها هو ما ورد فى موقع وكيبيديا فى مقالة السلطان احمد :

يحكى أنه عندما همّ ببناء مسجده أخبره أحد مستشاريه بأن هناك أثر لقدم النبي صلى الله عليه وسلم موجودة بمسجد السلطان قايتباي بمصر وعرض عليه إحضارها لتوضع بمسجده الجديد، فتحمس السلطان لهذا ووافق. وبعد أن أحُضر الأثر إلى إسطنبول رأى السلطان مناماً وكأنه يقف في محكمة للسلاطين يتوسطها النبي محمد صلى الله عليه وسلم، فتقدم السلطان قايتباي إلى الرسول وشكاه أن السلطان أحمد قد أخذ أثر القدم الشريفة من مسجده بعد أن كان قد اشتراها ب400 ألف دينار من بعض الأشراف الذين توارثوها ووضعها في مسجده كي يدعو الناس دائماً له بالخير. فحكم الرسول صلى الله عليه وسلم بإعادة الأثر لمسجد قايتباي. فلما إستيقظ السلطان من منامه دعى العلماء وطلب منهم أن يفسروا المنام، فقالوا له "يا مولانا السلطان، إن الرؤية واضحة ولا تحتاج لتفسير" فأمر السلطان بأنه يعاد الأثر الشريفة لموضعه

مقالة وكيبديا عن السلطان احمد

هنا ان صحت الرواية فهى بتأكد ان من وقت طويل جدا معروف ان ده اثر من اثار رسول الله ... و بتؤكد كذلك ان الأثار دى كان بيبيعها الأشراف للملوك و من يريد الاحتفاظ بأثار رسول الله - صلى الله عليه و سلم - للتبرك بها ... 

و هنا خبر تانى عن موقع صدى البلد يذكروا فيه مصدر اخر 

مقالة صدى البلد

و ما يشبه ذلك ما حدث فى الأردن من افتتاح مسجد الحسين بن طلال و افتتاح متحف بداخل المسجد يضم بعض المقتنيات من اثار رسول الله  -صلى الله عليه و سلم - 

الخبر على هذه الصفحة

و لعل اشهر ما ذكر فى بعض اثار النبى - صلى الله عليه و سلم - هو غرفة الأمانات المقدسة فى سراى الباب العالى فى اسطنبول فى تركيا ...

و هى تضم سيوف رسول الله - صلى الله عليه و سلم - و بعض متعلقاته ... و ايضا اثار بعض الصحابة و كسوات قديمة للكعبة و نحوها ... و تقدر تشوف قسم كبير من الاثار دى منتشر فى الفيديوهات بتاعت الباب العالى على الانترنت ...

معلومات عن العهدة الشريفة فى الباب العالى

جزء من جناح العهدة الشريفة للأمانات المقدسة 

و ملحقات الباب العالى نفسها يذكر انها كانت املاك الخلفاء العباسيين فى القاهرة ... و انها فى الاخر كانت مع المتوكل على الله الثالث اخر خليفة عباسى فى القاهرة و اللى سافر اسطنبول و معاه الاثار دى ... هى اثار عموما و لكن بعض الائمة تشكك بهذه المواضيع ... و لكنى لم اشعر بذلك مثلا من الشيخ الشعراوى - رحمه الله - و هو طبعا يصيب و يخطأ و لكن كان عنده معلومة و استشهد بيها وقت شرحه للأية الكريمة عن تابوت بنى اسرائيل فى الفيديو فوق ...

من اثار النبى - صلى الله عليه و سلم - ما كتب فى كتاب ابن بطوطة : ( تحفة النظار فى غرائب الأمصار و عجائب الأسفار ) صفحة 65 ... اللى اتكتب فى ذكر يوم المحمل ان هناك قطعة من قصعة رسول الله - صلى الله عليه و سلم - و الميل الذى كان يكتحل به و الدرفش و الأشفا الذى كان يخصف به نعله ... و انه تم شراء هذه الأثار وقتها ب100 الف درهم ... 
اذا فالموضوع قديم فى شراء الاثار النبوية و ليس بحديث نهائيا ...

فالسؤال هنا ... هل الملوك و الأمراء و حتى خلفاء المسلمين فى الماضى من سلالة بنى هاشم و احفاد عم رسول الله - صلى الله عليه و سلم - و الأشراف جميعا و ما توارثوه كله كان كذب ؟؟ .. الله اعلم .. صحيح ان الأنبياء و المرسلين لم يورثوا دينارا و لا درهما و لم يورثوا شئ ابدا ... و لكن هذه الأشياء حسب علمى لم تدخل فى هذا السياق لأنها اخذت منه - صلى الله عليه و سلم - فى حياته ... كما حدث مع خالد بن الوليد - رضى الله عنه - بل كما حدث فى تابوت بنى اسرائيل ... هى اشياء توارثوها ... و لكن من اثارهم ... 

 فأنا هنا اريد ان اعلم من اهل العلم هل هذا صحيح ام لا ... خصوصا انى اطمئن انه من اثاره - صلى الله عليه و سلم - اثار تتناقل فهل يعقل انه مثلا من يأخذ شعرة لرسول الله و يتبارك بها انها تضيع بمرور الأيام ؟؟ ... من هذا المؤمن الذى يفرط فى هكذا اثر ؟؟ ... و هل من المعقول ان يتناقل الخلفاء سيف لرسول الله - صلى الله عليه و سلم - و يكون النتيجة فى النهاية انه مش هو ؟؟ ...

و هناك من يقول انه الاشكالية من الاساس فى اثبات ذلك و منهم الشيخ المنجد - حفظه الله - ...

فهل تناقل خلفاء المسلمين و ملوكهم وامرائهم لأثر من اثار النبى ليس دليل ؟؟  

الله اعلم ... و لكننا كما ندقق فى الروايات و الأحاديث مش المفروض برضه من القران الكريم و الأمر فيه بحفظ و صيانة الاثار المقدسة اننا نتأكد من صحة الأثر ان كان للنبى و لا لأ ؟؟ ... احنا متأكدين من مقام نبى الله ابراهيم - عليه السلام - بنفس الأسلوب ... ليه مش مع اثار النبى - صلى الله عليه و سلم - نفس الكلام ؟؟ ...

عمرك شوفت دين بيأمر بالحفاظ على الاثار ؟؟ ... الدين الاسلامى بيقول كده ... حسب ما فسر الشيخ الشعراوى - رحمه الله - و جزاه كل خير ...

و هنا نأتى لقسم من المقالة لاثار هى معتقد انها للأنبياء و هى ليست كذلك فى الدين الاسلامى ...

منها مثلا ما يتصل بنبى الله عيسى فى بعض المعتقدات فى اوروبا ... منها ما ذكر فى تاج لومبارديا ( ايطاليا ) ... انه معتقد ان المعدن الذى يربط التاج من الداخل هو معدن من ما تبقى من الصليب الذى صلب عليه المسيح ( حسب الاعتقاد المسيحى ) و هو طبعا بالعقيدة الاسلامية لم يصلب النبى نفسه من الاساس ...على اى حال تم اكتشاف ان الخبر خاطئ لأن المفترض انه كان حديد من جوه و كان اتعمل من مسمار فى الصليب لكن اتضح ان دى فضة .... هذا التاج موجود اليوم بأيطاليا ... و احد اخباره انه تم لبسه من نابليون وقت اعلان نفسه ملك على ايطاليا ... كأشارة لتتويجه على البلاد الايطالية ... 

تاج لومبارديا ( ايطاليا القديمة )

معلومات زيادة عن هذا التاج و تيجان اوروبية اخرى

من هذه المقالة نستخلص الاتى :

1- قول الشيخ الشعراوى - رحمه الله تعالى - بحفظ و صيانة الاثار المقدسة هو شئ لم يتعارض مع الدين و انما هو شئ امر الله تعالى به و يؤمن به المسلمون .

2- تابوت بنى اسرائيل و ما يختص به من اخبار موجود فى الديانات الابراهيمية و ده دليل كبير لسكان الأرض على صحة الخبر ممن لا يؤمن ... فهذه معجزة فى وجهة نظرى قديمة و حديثة فى القران كمان ... 

3- القيمة الاثرية العالية لأثر زى ده .. فهو اكبر من الاوتوجراف و متعلقات المشاهير ...

4- التحليل للأمور التاريخية بتمعن و دقة ... فعندما نرى مثلا قدرات خارقة مثلا فى تابوت بنى اسرائيل وقت اصطحابه للمعارك معهم نفهم ان هذا يرجع لمفهوم دينى قديم يخص الاثر ... فهنا هنجد انه حتى اثار النبى كان يتم التبرك بها لأجل ذلك و كانت نفس المفهوم ... البركة ... و هذا ما يسموه بالشئ الخارق ... هى البركة بأمر الله تعالى ...

5- اقترح الاتى : ان يكون فى دعوة عالمية لأن اي اثر مش متأكدين من مصدره و يكون منسوب بالأخص لرسول الله - صلى الله عليه وسلم - او احد انبياء الله تعالى - عليهم السلام - يتكتب تحت بند ( يعتقد انه للنبى ) ... يا جماعة احنا بنحتفظ بأثار ناس عادية تماما بل و احيانا اناس فاسقين ... فأزاى مش هنحتفظ بشئ قديم بل و معتقد انه للنبى ؟؟ ... فكونه مش مؤكد انه للنبى لابد من الحفاظ عليه لأنتساب ذلك ليه ... 

اذا كان فى خطأ فيما قلته اسأل ربنا سبحانه و تعالى انه يغفرلى ... و يا ريت لو حد يصححلى اى خطأ غير مقصود انا وقعت فيه ...

شكرا

استكشاف الماضى و ما له فى الأراضى

بسم الله الرحمن الرحيم

 ملحوظة

 المقالة دي هى عبارة عن رأي شخصى مزود بالمصادر العلمية من كتب التاريخ و مقالات الأنترنت ... انا منقلتهوش من حد دى مقالة انا كاتبها بنفسى ... و هذا العمل اشبه ما يكون ببوستات الفيسبوك اللى انا كنت بكتبها و لكن على اكبر شوية ... فهتلاحظوا كثير من العامية يا حضرات ... الحاجات دى قابلة للنقاش طبعا و يا ريت لو حد يناقشنى فيها و يزود عليا او يقولى غلطى فيها ... طبعا بأسلوب علمى بالأدلة يا ريت او يستفسر منى عن تفاصيل اكبر فى اى نقطة هو عايزها ... لأن المقالات اللى من النوع ده هي برضه سرد للى انا بتعلمه مع نفسى من علم التاريخ و هكون سعيد جدا لو حصل ان حد طلب انه نتعلم سويا و نتناقش مناقشة كاملة على الجروب عندى فى الفيسبوك ... و ده احد اهم الاهداف الكبيرة ليا من المدونة و الفيسبوك و هو انى ازود معرفتى فى التاريخ بالذات بكثير من المناقشة

جروبى على فيسبوك

https://www.facebook.com/groups/Esterlab2017/ 

.....................................................................................................................................................................

طبعا كان فى السابق انك تسافر للأماكن دى شرط اساسى و مازالت بالطبع شئ اساسى انك تروح الأماكن التاريخية لما فيها من امتاع و لما فيها من فائدة علمية لو كان ده مجال دراستك او حتى غاوى المواضيع دى ...

 احد اكثر المواضيع المهمة فى دراسة التاريخ عموما هو موضوع الاثار و اذا ذكرت الاثار لابد من ذكر اماكن الاثار و اللى اتبقى من الأوقات البعيدة و القريبة دى ...

و طبعا عشان انا بحب انى اتكلم فى حاجه جديدة محدش اتكلم فيها اوى قدامى فى مواضيع التاريخ و اقولك ان لحسن الحظ ان مصر فيها الكثير من الاثار من حقب زمنية مختلفة قد تكون اكثر بلد فيها اثار فى العالم و الكثير من المتاحف العالمية بتمتلك شئ اصلى بيميزها عن بقية متاحف العالم من الأراضى المصرية ... غير طبعا مسلاتنا بره و اللى موجودة من مئات السنين فى بعض الدول كلها دليل على ما تحتويه الأراضى المصرية من وفرة فى الارث الحضارى الانسانى ... و كلها بالنسبة للمصريين بأسعار رمزية و فى اماكن لحد انهرده فى منتهى الروعة و مش مصريين كتير يعرفوها و زيارة الاماكن دى سهل و رخيص و و الدنيا جميلة ... و كان فى بديل طبعا عن الكلام ده كله ... و هو الكتب و طبعا دى كانت للأسف وسيلة مملة و غير ممتعة لكثير من الناس ... هههههه طبعا احسب انى مقولتش كل ده ... لأن كلنا عارفينه ... لكن برضه برضه فى حاجات كتير مش كل الناس تعرفها ... 

طبعا الوقت الحالى لم يعد مقتصر على الاطلاق على الزيارات بس ... الأنترنت مخلاش بصراحة ... بقى فى حاجات موجودة على الأنترنت كتير دلوقتى و لدول العالم كله طبعا ... يعنى فى مثلا تطبيقات على الموبايل دلوقتى بقى سهل جدا انك تتفرج على مساجد و على كنائس و على قلاع و حصون و ما الى ذلك و انت قاعد فى بيتكم و بتفاصيل كبيرة جدا طبعا ...

مثلا

ده فيديو انا لقيته لواحد بيتمشى فى قلعة قايتباى و بيحاول يشرح هو بيشوف اية بس باللغة الأنجليزية 

و ده فيديو يا سيدى لقلعة من قلاع انجلترا و فيديو صامت بيوصل مدته لأكتر من ساعة الا ربع 

جولة فى سور الصين العظيم ؟؟

جولة فى برج ايفيل ؟؟

جولة فى تاج محل فى الهند ؟؟

نلاحظ جميعا ان معظم الأعمال دى باللغة الانجليزية و كمان في منها اللى فيديوهات عليها تعليق و فيديوهات صامته فاللى عليها تعليق نكون شاكرين لو حد تطوع و ترجمها لبقية الناس ههههه لأنى انا شخصيا لو تطوعت مش هخلص حاجه لكثرة الفيديوهات و انا صراحة بعشق الفيديوهات الصامتة اكتر رغم ان طبعا التعليق اوقات كتير بيكون مفيد لكن انا بحب استمتع بالمكان و مشاهدة و حفظ تفاصيله بشكل كبير ...

طبعا الكلام ده مش مقتصر على فيديوهات طبيعية بدقة 1080 او بدقة اعلى بس و انما كمان تقدر تتفرج على حاجات من دى 360 درجة كفيديو و كمان vr : virtual reality

طبعا الموضوع ده مبيشملش حاجة معينة و انما تقدر تستفيد بالخاصيات دى زى ما ناس كتير عارفة على الموبايل و الشاشة و البلايستيشن و الحاجات دى كلها و اتذكر انى شوفت على تطبيق على الموبايل اسمه  places in vr لو كان لسه موجود بالأسم ده مساجد و قلاع و اماكن كتير اثرية يعنى اتذكر انى شوفت قصر شويفانيشتاين فى المانيا بتفاصيل كبيرة جدا و كأنى كنت هناك بسبب الخاصية دى رغم بساطة التطبيق لكن بمجرد ما لبست النضارة كان كأنى بتمشى جوه المكان و لو مكنتش لبستها كنت برضه هتفرج على الموبايل عادى و كأنى حاطط حاجه بتتجسس على الاثار فى المكان ده هههههه كل التفاصيل كأنك انت هناك ...

طبعا دى كلها حاجات مكانتش موجودة زمان و بقت موجودة في ايدك دلوقتى بفضل التكنولوجيا اللى احنا فيها فلو عايز تستفيد بالحاجات دى سهل جدا طبعا لازم تحط فى اعتبارك شوية عيوب ... هو ان الحاجات دى عمرها طبعا ما هتجيب تفاصيل المكان زى ما انت نفسك ممكن تجبها لو روحت هناك ... يعنى وقوفك فى مكان معين و تركيزك مع شئ معين بيبقى طبعا فى منتهى الأهمية لو روحت انت شخصيا لكن ده حل موجود لا بأس بيه اطلاقا بل ممتاز فى اوقات كتير ...

طبعا انت فكرك كده ان كل شئ باللغة الانجليزية ... صح ؟؟ ... لا الصراحة فى مجهودات جبارة فى مجال الفيديوهات و احد ابسط الحاجات و اكثرها تأثيرا ما وجدته فى صفحة المماليك على الفيسبوك ليوسف اسامة ... تحفة ... عمله عبارة عن تحفة فنية لمحبى الاثار و الهواة و للدارسين و عرفت منه معلومات كبيرة جدا و لسه بعرف ما شاء الله عليه ... غير انه بيعمل رحلات ميدانية كتير لكن انا مجربتش الصراحة ... غير ان في قناة على اليوتيوب كذلك ...

رابط صفحة المماليك على الفيسبوك

رابط القناة على يوتيوب

و ده دليل كبير طبعا ان فى بعض التعليقات على الفيديوهات بتكون فى منتهى الأهمية لأن الراجل بيقول كلام زى الفل ...

غير طبعا الافلام الوثائقية و طبعا مش كل الناس بتحب الحاجات دى غير ان الافلام الوثائقية مش كل المنتجين و المخرجين ليها بيخلوك تتشد للمحتوى غير ان الفيلم مبيكونش هدفه طبعا زى هدف الفيديوهات و الحاجات اللى ذكرناها و بيكون تركيزه على شئ واحد ...

اتذكر موقفين حسسونى بأمتاع تاريخى غريب اول واحد فيهم لفيلم من افلام ناشونال جيوجرافيك ابوظبى و هو كان فيلم بيحكى عن مقبرة توت عنخ امون و كان الراجل اللى بيحكى فى الفيلم وصف قد اية ان مكان المقبرة الجغرافى ساعد ان المكان ده ميتسرقش و ازاى متمش اكتشافه رغم ان حواليه عشرات المقابر المنهوبة و ان فى صخور نزلت سدة المدخل و حجبته عن السارقين ... كان شرحه فى منتهى الروعة ...

خريطة خيالية للتوضيح

و التانى برضه كان ناشونال جيوجرافيك بس كان بيحكى عن استكشاف الذهب فى مصر القديمة فأحد الحاجات اللى كان بيتكلم فيها هى ان عملهم بسبب انه كان شاق فكان لازم يحفروا ابار على طول الطريق المؤدى للمنجم اللى بيستخرجوا منه الذهب ... فلو عرفت انك ترسم على ورقة او صورة للموقع اماكن الابار دى بالتدريج كأنك رسمت خريطة كنز قديمة ... الجملتين دول مع الشرح و الصور كانوا فى منتهى منتهى الروعة و هنا بيوريك قد اية ان استخراج الكنوز القديمة و استكشاف الاثار شئ صعب و قد يكون مستحيل انك تبحث فيه من غير علوم تاريخية ... و هكذا معلومات بالطبع مش هتيجى غير من الأفلام الوثائقية و كتب التاريخ ...

 على رأى انديانا جونز ( الشخصية الخيالية ) قال مكان الذهب مبيكونش معروف من ورقة عليها الموقع فى خريطة و مكان الذهب عليه علامة اكس ... رغم انى كنت اعرف معلومة و مش عارف اذا كانت صحيحة و هى ان استكشاف الكنوز فى وقت زمن القراصنة فى امريكا و حروبها مع اسبانيا كان بيكون ان القرصان بعد ما بيستولى على كنوز و اموال السفينة اللى بيضربها بيأخد الكنوز دى و يخبيها فى اماكن على جزر فى البحر الكاريبى و من هنا جات شهرته بالمواضيع بتاعت القراصنة و كان طبعا عشان يتذكر كان دفن الكنز فين كان لازم يرسم خريطة و عليها علامة الاكس اللى بتوضح الموقع بالتحديد بتاع الكنز ... ههههه الله اعلم بصحة الرواية لو حد عرف يقولى ...

عندك مصدر مهم و امتاعى للغاية عشان تجيب تفاصيل اكبر ... 

 

طبعا كتير من الناس لما بيزور الأماكن التاريخية بيتصور صور او بيصور فيديوهات زى الناس اللى احنا شوفناها ... احب اقولك ان الناس دى من غير ما تحس تقدر تقول انها انقذت التاريخ و الارث الانسانى بالفعل ده ... هتقولى ازاى ؟؟ ... اقولك ازاى ..

احد الحوادث الشهيرة اللى كنت عرفتها شخصيا من دراستى فى الهندسة المدنية و بالأخص المساحة ... عرفت انه تم انقاذ بعض المعالم من خلال الصور ... فعلى سبيل المثال جسر موستار فى البوسنة يعتبر احد اثار المدينة من العصر العثمانى و صممه و من تصميم مهندس معمارى شهير جدا هو خير الدين و هو من تلامذة معمار سنان اللى مشهور عنه انه عمل الطفرة المعمارية فى الاستانة عاصمة العثمانيين ... طبعا قيمة تاريخية هندسية عريقة ... للأسف تم تدميره خلال حرب فى التسعينات و كنت عرفت معلومة ان اتعمل اعلان لكل واحد زار الجسر و اتصور عليه انه يبعت الصور بتاعته على الجسر و يبعتها عشان يعملوا نفس الجسر و كمان من نفس مواد البناء القديمة ... مشروع ثقافى كبير جدا و مهم للسياحة فى البوسنة طبعا و بالفعل تم انقاذ الجسر و اتبنى من تانى ...

جسر موستار فى استارى موست فى البوسنة

طبعا فى حادثة تانية مشهورة بشدة ... و هى حرق كنيسة نوتردام فى باريس و طبعا دى من اشهر معالم باريس المعمارية ... اللى انا عايز اقولهولك ان طبعا هيعاد بناء الكنيسة بنفس الطريقة اللى اتبنى بيها جسر موستار فى البوسنة و مش بس كده يا معلم ... لاااا ... و قالت اليوم السابع ... وباستخدام أكثر من مليار نقطة من البيانات، 

تمكن "تالون" بإعادة الحياة إلى الكاتدرائية، إذ استخدم آلة ليزر دوارة لقياس المواصفات الدقيقة الداخلية والخارجية للكنيسة بشكل ثلاثى الأبعاد فى أكثر من 50 موقعًا، ثم استخدم صورًا بانورامية لنفس المواقع التى تم تعيينها بواسطة أشعة الليزر لتجاوز التفاصيل الجمالية، والتى سمحت لـ"تالون" بتجميع نسخة متماثلة لم تكن دقيقة فى الأبعاد فقط ولكن فى المظهر المادى للكنيسة ... متخيل ؟؟|

كنيسة نوتردام فى باريس

الصور اللى انت بتتصورها مهمة جدا لأعادة احياء موقع تاريخى تم هدمه بالفعل ... فموجود لبلادنا و بلاد كتير الالاف من الصور لوصف الماضى تم التقاطها منذ اختراع الكاميرا الى اليوم و بعض المتطوعين بيمسكوا الصور دى و يضيفوا ليها الألوان فبتكون كأنها اتصورت بالألوان فى العصور دى ...

يعنى من اسوء الحاجات اللى كنت اعرفها تاريخيا ان فى اماكن كانت موجودة فى ماضى مش بعيد جدا زى الفراعنة و ضاعت و ماتت و معرفناش نرجعها زى الجسر و كنيسة نودتردام لأن مكانش فى تصوير زى مثلا بغداد ايام العباسيين ... المدينة دمرت تماما بسبب الغزو المغولى المشهور للمدينة و كل ما تبقى لينا من بغداد العباسية فى عز مجدها هو شوية أوصاف وصلتنا من الكتب ليس الا ... كمان فى معابد و قصور و قلاع مش هترجع تانى مما يعنى ضياع جزء من اجزاء الفن المعمارى القديم زى مثلا اللى حصل فى قلعة كونغيسبرج فى المانيا ... قلعة فضلت من سنة 1255 لسنة 1946 و طبعا كان فى تصوير واتصورت من بره لكن تفاصيلها اختفت بالتأكيد 

قلعة كونغيسبرج

و كذلك كان برضه معبد البارثينون فى اليونان اللى فضل من ايام الاغريق لحد سنة 1687 ميلادية لما القوات العثمانية خزنت فى بارود (حسب كلام وكيبيديا ) و هوووب انفجر و مفاضلش منه غير أطلال و حطام للأسف الشديد بعد ما كان معبد و كنيسة و مسجد و بعدين اثناء الحرب مع فينيسيا تم تفجير المسجد ... طبعا اكيييييد ضاعت معالم كبيرة جدا و كثيرة جدا ...

البارثينون

غير ان فى العاب شهيرة جدا على البلايستيشن و جهاز الكمبيوتر بتصور الاماكن التاريخية بأشد التفاصيل الممكنة المطابقة للواقع و هى برضه ممكن تكون مرجع مهم فى الحالات اللى زى كده ...

بهذه المناسبة طبعا احب انى اشوف فى يوم من الأيام و يا ريت لو اشارك شخصيا فى اعادة بناء المسجد الأموى فى دمشق ... المسجد الأموى تحفة الخلافة الأموية و الاسلامية ... انا عايز اقولكم انى اتفرجت على تفاصيل المسجد بعد هدم اجزاء منه و تعرضها للتخريب طبعا على الكمبيوتر و فى مأذنه للمسجد كانت واقفة فى مكانها اكتر من 800 سنة لحد ما جه صاروخ تقريبا او قنبلة و وقعت المأذنة التاريخية دى ... طبعا منظر محزن جدا و اتمنى ان شاء الله لما تخلص الحرب ( املنا فى ربنا كبير ) انه يتم اعادة اعمار المسجد بكامل تفاصيله بدون اى تقصير ...
خبر عن دمار المسجد فى اليوم السابع و مزود بصور

الدمار فى المسجد الأموى فى دمشق

و برجوا كمان لو يكون فى أرشيف ضخم معظم الصور اللى بيتم التقاطها فى المعالم الاثرية من الناس يتم جمعها فيه بتطوع من الناس طبعا بعد ما نقولهم على الفايدة التاريخية للفعل ده فى المحافظة على التراث الوطنى و الانسانى ...

احد المواضيع برضه اللى شدتنى بشدة وقت ما كنت بتفرج على التليفزيون  فى مرة و جه قدامى فيلم اجنبى اسمه 

Chernobyl Diaries و الفيلم ده فيلم رعب كان بيوصف منطقة فى أوكرانيا بتتصنف انها مدينة اشباح بسبب الاشعاعات الذرية ... اسكت ؟؟ ... لا طبعا ... انا مختل بالتاريخ هههه ...

دورت و اكتشفت ان مدن الأشباح دى منتشرة فى حتت كتير من بقاع العالم ... و هى مدن تم هجرها لأسباب مختلفة منها اللى زى كده فيه تلوث اما بسبب اشعاعات ذرية او تلوث فى المياه المحيطة او حتى الهوا و ممكن بسبب الحرب و ممكن بسبب اجتماعى ان الناس مش عايزة ببساطة تسكن فى المكان ده ... و الانترنت مليان بصور من البلدات اللى تم هجرها بالكامل اما حديثا او قديما لحد دلوقتى و بيسموها فى بعض الثقافات مناطق اشباح لخلوها من الناس و هجرهم ليها ... طبعا امريكا كان ليها حظ وافر من المدن دى و بعض المدن دى فى الأمريكتين عموما كانت مدن اتبنت جمب مناجم سواء ذهب او فضة او زنك او اى معدن من المعادن دى و كان بيتم عمل مدينة كاملة جمب المنجم لهدف استخراج المعادن طبعا جو كاوبوى و غرب امريكى اصيل زى ما كنا بنشوف فى الأفلام الأمريكية بالظبط و طبعا انا وقت ما بتفرج على الأفلام دى عموما لازم اتذكر مجموعة اشياء و لبس و اسلحة معينة بسبب الأفلام منها مثلا المسدس و الطاقية المشهورة بتاعت الكاوبوى اللى هما رعاة البقر و لبسهم المميز و ما الى ذلك ... و بعض المدن دى اللى اكتشفته انه بيتم بيعها فى البلدان دى زى امريكا بهدف تحويلها لمناطق جذب سياحى او غيرها ... و طبعا المدن دى قديمة من القرن ال19 و مهجورة فوق ال100 سنة ...

قائمة بمدن الأشباح حسب القارة مسجلة على وكيبيديا الأنجليزية

اثناء بحثى على الأنترنت وجت قناة لواحد امريكى فى منتهى منتهى الروعة ... لمدينة من المدن المنجمية القديمة دى فى ولاية كاليفورنيا سيروجوردو و دى كانت مدينة منجمية اتبنت و تم استخراج من مناجمها ما يصل فى وقتها ل500 مليون دولار امريكا عام 1864 تقريبا من فضة و زنك و ما الى ذلك ... طبعا المدينة فى وسط الجبال كما فى الأفلام تماما و مبانيها القديمة ... طبعا الممتع فى موضوع مش ده بس ... و انما صاحب قناة اليوتيوب هو نفسه الراجل صاحب المدينة ... اشتراها ... و بيصور بقى تقدر تقول بشكل دورى اللى بيعمله هناك من اعادة لأستكشاف المدينة فى مناجمها و نزوله و تصويره هناك فيها و فى الأنفاق بتاعتها و في البيوت و الكتب اللى بيلاقيها و الاثار اللى بيلاقيها فى ارض المدينة على مساحة 335 فدان فى وسط الجبال و طبعا ده امتاع تاريخى من نوع جديد لم ارى مثيل له حتى الان ... غير الناس اللى بتوصل هناك و يصوروا قصص ترفيهيه عن استخراج الكنوز من هناك و قصص اشباح و قصص قديمة لمن سكنوا هناك و ما الى ذلك ... و هو نفسه بيعمل فيديوهات عن الحاجات اللى بيستكشفها فى المنطقة من ملابس قديمة و زجاجات و ادوات و كتب و مذكرات و اسلحة و اوانى و ما الى ذلك ... فهى تجربة لم اعيشها من قبل ...

احد فيديوهات القناة ...

طبعا القناة باللغة الأنجليزية ... لكن انا متفائل ان حد يبقى يترجمها للناس قريبا هههههه ... الصراحة امتاع تاريخي منقطع النظير ... تخيل انك بتملك مكان اثرى بالكامل ليك لوحدك و بتستكشفه ... موضوع مميز فعلا ...

غير طبعا ان على سيرة الأماكن التاريخية اللى بتملكها ففى معانا كذلك اماكن تاريخية ممكن تتملكها بنفسك ... بس مش مدن بقى ... و انما قلاااع ... ايوة يا معلم ... قلعة كاملة ليك لوحدك ... 

ده فيديو لواحد تملك قلعة ليه لوحده بهدف استثمارها سياحيا

طبعا هتقولى يا عم طب ما دى فلوس ... يا سيدى ربنا يدينا و يديك هههههه ... الفكرة انى بوريك اشياء مختلفة ... يعنى المدينة اللى الراجل ده اشتراها انت ممكن تروحها فى يوم من الأيام و تعمل الحاجات اللى هو بيعملها ... قصة زى كده بقى هتخرجك من قصص التصريحات و الحكومة و ما الى ذلك ... ببساطة لأنها ملكية خاصة ... فتخيل بتمارس هوايتك فى البحث عن الاثار و الكنوز جوه ملكية خاصة بشكل قانونى ... موضوع مختلف هو طبعا مش مكان بأهمية الأهرامات لكنه تاريخ برضه ... و فى نفس الوقت يكون عندك وعى بأنك ممكن تشترى قصور و قلاع و بيوت و حتى مدن قديمة و تستثمرها سياحيا ...

فيديو عن بيع القلاع

و فى كذلك يا معلم قلاع بأرخص الأسعار و ممكن متصدقش انك تشترى بعض القلاع دى ب 0 دولار ... ايوة 0 ... لكن بيبقى عليها قيود معقدة جدا و شروط لابد من تنفيذها زى مصاريف ترميمها و مصاريف تشغيلها سياحيا و ما الى ذلك و طبعا دى بتكون شروط لتمتلك موقع اثرى زى ده و دى حاجه مش رخيصة ابدا و بعض الناس رأيها ان ده بينفى كلمة انها ببلاش او 0 دولار من اساسه ...

لكن اهو ... 
تقدر تروح اماكن خاصة تاريخية او تتملكها من اساسه لو معاك فلوس ... انك تشوف تفاصيل التفاصيل لأماكن كتيرة من البيت ... تعيش واقع افتراضى بأنك تتفرج على الحاجات دى من الداخل كأنك روحت هناك بالفعل ... غير انك انت نفسك مشروع تاريخ محصلش ... ايوة ...تخيل كل الصور اللى بتاخدها و تفاصيل حياتك دى هتهتم الناس بيها بعد 100 سنة بس ... هههههه و الله ... يعنى تخيل انت نفسك بتسجل تاريخ من غير ما تقصد و اللى بيفضل منك و من مقتنياتك بيتسمى اثر ... ما بالك بقى لو انت بتساعد فى كده بأنك تصور و تسجل و تزور الأماكن دى و تكتب رأيك العلمى فيها ... وانك تتعلم ان كل شئ بتعمله ممكن تستفيد منه حاجه ... زى حتى لو بتتفرج على فيلم رعب زى ما قلنا ... متخيل ؟؟ ...

متخيل انك لو حبيت مثلا هواية زى جمع الطوابع و العملات التذكارية و القديمة و التحف و اللوحات و ما الى ذلك انت ممكن تعمل متحف خاص بيك ببساطة ... و تستفيد و تفيد غيرك بيه ... و ممكن كمان تبيع المقتنيات دى بأعلى الأسعار فى وقت لاحق ...

 دلوقتى عرفنا الاتى :

1- التصوير مهم جدا و بينقذ التاريخ و بيعلمه للأجيال اللاحقة غير انه ممكن يعيد الحياة لمكان مدمر
2- الاستفادة من اليوتيوب و مواقع الفيديو فى مشاهدة مئات المعالم السياحية حول العالم و بأعلى دقة و vr
3- الاماكن الاثرية فى بعض البلدان ممكن بيعها عادى جدا و الاستفادة بيها و تحويلها لشئ تاريخى 
4- التاريخ ممكن يجيب فلوس حلوة اوى لو تم استغلاله مظبوط فى الكشف عن الكنوز 
5- الأماكن الأثرية منجم ذهب لو تم استغلالها استغلال سليم ببروباجندا مظبوطة مش للدارسين بس طبعا و انما للهواة و اصحاب الهوايات و الاستكشاف
6- استخدام كلمات لعمل سياحة افتراضية من الفيديوهات بأستخدام كلمات silent walk و virtual tour و ما شابه ذلك

شكرا 
و السلام عليكم و رحمة الله

ايضاح العلة فى تصديق التاريخ و الأدلة

  بسم الله الرحمن الرحيم 

ملحوظة
المقالة دي هى عبارة عن رأي شخصى مزود بالمصادر العلمية من كتب التاريخ و مقالات الأنترنت ... انا منقلتهوش من حد دى مقالة انا كاتبها بنفسى ... و هذا العمل اشبه ما يكون ببوستات الفيسبوك اللى انا كنت بكتبها و لكن على اكبر شوية ... فهتلاحظوا كثير من العامية يا حضرات ... الحاجات دى قابلة للنقاش طبعا و يا ريت لو حد يناقشنى فيها و يزود عليا او يقولى غلطى فيها ... طبعا بأسلوب علمى بالأدلة يا ريت او يستفسر منى عن تفاصيل اكبر فى اى نقطة هو عايزها ... لأن المقالات اللى من النوع ده هي برضه سرد للى انا بتعلمه مع نفسى من علم التاريخ و هكون سعيد جدا لو حصل ان حد طلب انه نتعلم سويا و نتناقش مناقشة كاملة على الجروب عندى فى الفيسبوك ... و ده احد اهم الاهداف الكبيرة ليا من المدونة و الفيسبوك و هو انى ازود معرفتى فى التاريخ بالذات بكثير من المناقشة
جروبى على فيسبوك
https://www.facebook.com/groups/Esterlab2017/
.....................................................................................................................................................................

احنا بنيجى نقرأ تاريخ بنلاقى مشاكل كتير ....

اللى بنقرأه ده نبنى فهمنا فيه ازاى ؟؟ ... نصدقه و لا منصدقهوش ؟؟ ... شبه واقعنا المعاصر و لا لأ ؟؟؟ .... التفاصيل اللى فيه كانت خاصه بوقته و لا كل زمن ممكن تحصل فيه ؟؟ ...

انتشرت كوميكس و تريقة على الفيسبوك الايام دى على موضوع كان احد الاصدقاء حكى لى عنه ... الموضوع ده يخص جده الأكبر اللى عرف عنه اخبار ... كان بيقولى انه رفض شراء ارض كبيرة جدا فى عصره كان تمنها 5 جنيه بس ... و الموضوع ده فوجئت انه منتشر مش بس فى العائلات اللى حوليك و انما منتشر فى مصر كلها ههههه ... بصرف النظر عن الموضوع صادق او لأ من بعض الناس اللى بتقوله ... المشكلة الحقيقية هنا فى الفهم ... هل ال5 جنيه دى كتيرة و لا قليلة ؟؟ ... طبعا انت لو قيست على عصرك انها 5 جنيه اللى بتجيب بيها كيس شيبسى هتبقى مشكلة ... لأنك كده مفهمتش العصر اللى كان فيه الأرض ام 5 جنيه .... ببساطة لأن معظم الناس مكانش معاها ال5 جنيه دى و كان فى عملات كتير اقل من ال5 جنيه و كانت بتشترى معظم ضروريات الحياة .... زى المليم و القرش و الجنيه ده وصل فى فترة من الفترات بقيمة كبيرة جدا ... فكان اللى يكون معاه 5 جنيه دى حاجه كبيرة جدا بالنسبة للناس البسطاء ... و اساسا مرتبات الناس مكانتش كبيرة ... فالقيمة الشرائية لل5 جنيه وقتها كانت كبيرة جدا مثلا ... طبعا ده لسه موضحش اذا كانت رخيصة و لا غالية بس ابتدينا نفهم ان المبلغ كبير نسبيا بالنسبة لوقتها ... ساعتها بقى هتضطر انك تبحث فى اسعار العقارات و الاراضى فى الفترة دى و تقارن الاسعار ... و تبص على الاسعار فى الحتت الراقية و الحتة دى اللى فيها الارض ... و تفضل تقارن بين الاسعار ... شغلانة ... بحث .... ده ببساطة لأنك معيشتش وقتها ... 

ليه ؟؟ ... التفاصيل مهمة جدا ... و القراءة من مختلف الزوايا مهمة ... مهمة فى الفهم

احد المواضيع اللى حبيت انى ابحث فيها من فترة قريبة قصة تخص مدفع البازليك اللى موجود فى انجلترا و تم ضرب سور القسطنطينية بيه ... حسب وكيبيديا المدفع ده 18 طن ... يقال انه اتنقل و اتحرك ب200 ثور ...وكان المدفع عظيماً لدرجة أن تحريكه يتطلب جهد 60 رجلاً... هنفهم تقريبيا سويا ... 

مقال وكيبيديا عن المدفع

طبعا يخيل ليك فى العصر ده لو انت عايش وقتها بوزنه العظيم اللى بيجره 200 ثور فهو وزن عظيم جدا ليس له مثيل ... لكن فى الحقيقة بالنسبة لوقتنا الحالى هتجره شاحنة عادية جدا ... حسب ما دورت برضه لقيت قدرة محركات الشاحنات الثقيلة فتتراوح بين 200 وأكثر من 400 قدرة حصانية ... جيمس وات لما حب يقيس القدرة للمحركات اللى عملها قالك هنقيس قدرة الماتور بقدرة الأحصنة اللى كانت مستخدمة انذاك فى جر العربات ... فقالك دلوقتى الكاريته مثلا بتتجر بحصان او اتنين حقيقيين فدى قدرتهم على جر العربة دى ... فأحنا هنقيس قدرة الماتور تقدر تحل محل كام حصان ... قالك ان قدرة حصان على انه يرفع من الأرض وزن 75 كيلوجرام لمسافة متر فى ثانية واحدة هى دى قدرة الحصان ... طبعا بعد شوية حسابات متعددة و مراقبة للأحصنة و القصة دى وصلنا لمفهوم هو ثبته و قال عليه كده فبقيت قدرة الحصان بتتقاس كده ... فأنت لما تيجى تقول الماتور ده مثلا قدرته 200 حصان فأنت بتتخيل تقريبا ان العربية اللى فيها الماتور ده ممكن يحل محل الماتور بتاعها 200 حصان حقيقى تقريبا ... حاجه جامدة جدا طبعا ... فأحنا هنحسب 18 طن دول يشيلهم كام حصان ... فلو حسبناها هنلاقى ان 18 طن دول هتشيلهم شاحنة زى ما قلنا ممكن متقلش عن 200 قدرة حصانية فلما قالوا 200 ثور غالبا المعلومة مش مبالغ فيها هى تقريبية طبعا هو الثور بيجر اكتر من الحصان بشوية فكده نقدر نفهم ان 18 طن جرهم 200 ثور ده غالبا عادى ...

فنلاحظ دايما انك فهمك للأحداث التاريخية غالبا مش هتعرف تفهمه لوحدك ... لابد من تخصصات مختلفة تحلل المواضيع التاريخية الكبيرة ...

كتير مننا ممكن يوصل لمفهمومه انه وصل لحقيقة تاريخية من مجرد قراءة تفصيلة بسيطة ... زى مثلا على سبيل المثال ان (  الحملة الفرنسية فى مصر لها ايجابيات كبيرة بما فيها العلوم ) ... يذهب لمخيلتك فورا بمجرد القراءة ان الحملة الفرنسية لها كثير من الايجابيات العلمية ... هذا صحيح ... هناك ايجابيات علمية كبيرة جدا ... لكن كن فى منتهى الحذر ... هذا لا يعنى اطلاقا انهم يحترمون العلم كمان نتخيل فلا يجيب مثلا اخذهم مثل اعلى فى ذلك ... و انما استخدموه لمصلحتهم فى مصر ... ربما ... انت لا تعلم ... هنا انت لم تعرف اصل ما هى الحملة الفرنسية التى جاءت و ما اهدافها ! ...  انت لم تعرف اقتحامهم لأهم اماكن العلم فى مصر انذاك ... الأزهر الشريف ... كيف انهم دخلوه بخيولهم فى ثورة القاهرة الأولى  ... 

و كثير من الصحف و المواقع المصرية كل عام وقت ذكرى الحملة الفرنسية و فى مناسبات مختلفة يتذكرون هذا الحدث 

مقالة فى المصري اليوم

نابليون قبل وقف الضرب، ولكنه أرسل جنوده إلى الأزهر، فدخلوا الجامع بخيولهم عنوة وربطوها بصحنه وكسروا القناديل وحطموا خزائن الكتب ونهبوا ما وجدوه من متاع، ولم يخرجوا منه إلا بعد أن ركب الشيخ محمد الجوهرى إلى نابليون وطلب منه متوسلًا أن يخرج جنوده من الجامع الأزهر فقبل نابليون

طبعا فى كتاب ( وصف مصر ) هناك اراء تقول ان الكتاب هو كشف مصر بالكامل للمحتل الانجليزى الذى جاء بعد ذلك و كان اقتحامهم لمصر و معرفة شعبها و عاداته اسهل على الانجليز كثير من الفرنسيين الذين تفاجأوا بالموضوع لأول مرة ... فكان ده سبب مباشر فى كشف مصر امام المحتلين ... فما هو رأيك انت ؟؟

انت وقت قراءتك فى التاريخ لابد انك تعرف شئ مهم جدا فكرك الشخصى هيأثر عليك بشكل كبير جدا فى التاريخ و هويتك كذلك هتأثر عليك فى التاريخ كويس جدا ... ريتشارد قلب الأسد حتى اليوم فى انجلترا رمز للقائد الصليبى الأسطورى و فلاد الثالث المعروف بدراكولا اللذى عذب ضحاياه و اعدم الكثير من المسلمين بطلا فى بلغاريا و كذلك جنكيزخان بطلا فى منغوليا و تيمورلنك بطلا من ابطال الأتراك ... صحيح هم جميعا فى نظرنا قتلة و اعداء ... لكنهم ابطال قوميين فى بلدانهم ... هذا لا يمثل حقيقة تاريخية و انما اعتناق فكرى ... انت ممكن فعلا تشوف ريتشارد قلب الأسد بطل بالنسبة ليك ... ده لما تعتنق فكر ريتشارد قلب الأسد اصلا او يكون فكرك قريب من فكره ... فى فرق بين الاحترام و انك تستفيد بحياته فى اشياء معينة و فرق بين انك تشوفه مثل اعلى و بطل ليك ... اللى عايز اقولهولك الحقيقة التاريخية ساعتها هتكون دخول البلدان و احتلالها من قبل ريتشارد  قلب الاسد و معاركه مع صلاح الدين و حملاته على بلاد الشرق و المسلمين لكن سيظل الى يوم الدين من يرى ان البطل صلاح الدين و اخر يرى ريتشارد قلب الأسد هو البطل و هذا لن ينتهى الا اذا اصبح جميع البشر بفكر واحد .... هذا هو التاريخ ... الاحداث واحدة و التحليل مختلف من شخص لأخر و من حضارة الى اخرى و من وقت الى اخر و من شعب الى شعب ... مبادئ و ثقافة و فكر كل شعب و كل شخص و اخر هى ما تحلل الموقف ... و كله ليه مفهموه فى فهم الدنيا و الاستفادة من التجارب السابقة ...

ده تمثال لريتشارد قلب الأسد فى انجلترا 

اللى بيدور على حقيقة مطلقة كمان مش هيلاقيها ... كذلك لن يكون رأيك واضحا ابدا و هيكون ناقص نقص شديد لو انت مقرأتش بتفاصيل مختلفة ... تقرأ التفاصيل من بلدنا و من بلاد غيرنا و من كل شخص و تسمع من الجميع و انت من ستقرر فى النهاية رأيك ... ستقرأ عن ريتشارد منا و منهم و ستقرأ عن صلاح الدين منا و منهم ... و سترى رأيك فى النهاية ... يمكن تشوف ان الاتنين مجرمين و يمكن تشوف فى واحد فيهم بطل و التانى لأ ... و ممكن تحترم الاتنين و تكرههم  ... اعرف ان رأيك هو شخصيتك ... و اعرف ان اللى وصلتله هيشكل دماغك و فكرك ...

طب ازاى اساسا اصدق اللى بقرأه ؟ مش جايز يكون اصلا غلط ؟؟؟

التاريخ هو علم من العلوم الظنية كأى علم من العلوم الحياتيه معرض للصواب و للخطأ لعدم عصمة اى بشرى من الوقوع فى الخطأ و كلنا نعلم ان العلم هو عبارة عن تعبير لفهمنا للواقع و التاريخ علم بيعرفنا كل ما هو قديم من اخبار و تعليق عليها من المؤرخين اللى بيكتبوا الأخبار دى و الاثار اللى بنلاقيها و المخطوطات ...الخ و عند الاخذ بالأدلة التاريخية المكتوبة لا يجوز اخذها من مصدر واحد حتى لو كان المصدر ده هو المصدر الصحيح بنسبة 100 % كما يقال احيانا و حتى لو كان المصدر ده مصدر من مصادر حضارة تانية ... مفيش حاجه اتسجلت الا و ليها فايدة حتى لو كان اللى اتكتب تدليس وكدب ... ليه ؟؟ ... احنا منعرفش اساسا الخبر الصحيح علم التاريخ ده مبنى على كل ما وصلنا من اخبار و قصص و مخطوطات و اثار و اى حاجه بتشير للحقبة اللى الخبر التاريخى ده بيحكى عنها فبكده كل ما يمت للمرحلة دى بصلة فهو مهم للفهم ... يعنى اى اثر يتم ايجاده او اى مخطوطة او اى شئ بتقربنا اكتر للفهم ... بتقربنا اكتر للتوضيح الحقيقى ... مفيش حاجه مسلم بيها و مفيش حاجه صح 100% ابدا ... طبعا احنا بنستثنى الأحداث التاريخية المذكورة فى الروايات الدينية دى ليها حسابات اخرى ...

و بكده علم الاثار و علم التاريخ زى النظرى و العملى هما الاتنين وجهين لعملة واحدة الاتنين مهمين ... و طبعا بيساعدهم كل تخصص بيدرس اى حاجه قديمة من مخطوطات و غيرها ...

فأى حاجه بتتكتب و بتكتشف من أخبار قديمة او اثار يجيب انها تتحلل تحليل منطقى و قبلته او رفضته دى حاجه ترجعلك 

فتحاول دايما تسمع زى القاضى من جميع الأطراف و تقرر انت بقى رأيك فى النهاية ... خلينا متفقين على حاجه التاريخ كله اساسا ممكن يبقى مش صحيح بنسبة كبيرة و ممكن يطلع صحيح بنسبة كبيرة انت مشوفتش حاجه ... بس طول ما انت بتسمع الاخبار كلها و بتجمعها صح و بتعرف كل الزوايا على قد ما تقدر هتقرب للصح و هتعرفه غالبا و برضه هتقول الله اعلم ... البحث بتاعك مش لازم يكون زى ما حصل و صحيح لكن انت وصلك على الأقل جزء من الحقيقة اللى مبنية عليها الدنيا دلوقتى و الجزء ده هيبقى مهم من جميع الجوانب حتى الجوانب الدينية ... هيخليك تفهم الدنيا من حواليك ... اساسا لو بتقرأ فى التاريخ انت بنفسك لما توصل لبعض الأخبار هتقول انها كذب و انت محضرتش الخبر لأن فى 500 خبر تانيين من مصادر موثوقة بتكدب الخبر ... بس احتمالية ان خبر واحد قدام عشرات او مئات الاخبار هو اللى يطلع صح فده شئ مستحيل بنسبة كبيرة جدا و غير معقول اصلا ...

فأنت زى ما قلنا دايما تشوف الأخبار على قد ما تقدر بس دايما تكون مقتنع ان اللى عندك من اخبار هو قابل للتجديد بمجرد وصولك لمعلومة جديدة ... و تحاول تعرف اية اتجاه اللى بتاخد منه المعلومة التاريخية عشان لما بتعرف الأيدولوجية بتفهم اكتر ... و أقرأ تاريخك من عدوك برضه و اعرف كاتب عنك اية ممكن يكون نبه على حتة انت محتاج تصلحها فى نفسك او حتى أفترى عليك فيها فتعرف بيقول اية ....

ما نتعلمه من هذا الكلام :

1- التفاصيل فى منتهى الأهمية و علم التاريخ لا يعتمد للأسف الشديد على الأختصار 
2- التاريخ يختلف عن التأريخ ... فالأحداث العالمية كلها لا يختلف عليها اثنان فتسجيل الحدث تأريخ و لكن تحليل الحدث نفسه هو من علم التاريخ و هذا يختلف من مكان لأخر و من شخص لأخر و من عصر لأخر
3- التاريخ لابد من الاستفادة به نعم و نقيس منه على الحاضر و لكن قياسه على الحاضر يتطلب احيانا بعض البحث و الفهم للحدث القديم 
4- لا يوجد ما يسمى بالحقيقة المطلقة و لكن لكل شخص مفهومه فى فهم احداث الدنيا 
5- الماضى كالحاضر كالمستقبل فى تسجيل احداث التاريخ و لكن تحليل هذه الأحداث مفهومه يختلف ... و كذلك ما هو واضح و ما هو غامض نجده فى الماضى و الحاضر و غالبا حسب فهمنا ايضا المستقبل لا فرق ... دلوقتى فى اخبار انت مش فاهمها و زمان فى اخبار مش فاهمها و فى حاجات مش عارف تتنبأ بيها بعدين بسبب دلوقتى و الفرق بينهم كلهم هو المعلومات اللى فى ايدك فجيب معلومات من المصادر اللى تقدر توصل ليها ايدك ... و حللها كويس
6- فهم التاريخ يتطلب احيانا تخصصات مختلفة كما هو الحال فى اخبار الحاضر ... فلا تتعجل ابدا فى حكمك على شئ الا عندما تسمع او تقرأ او تعرف اراء المختصين بشأنه

متنسوش تبقوا تناقشونى فى كل ذلك يا جماعة ... و بالمناسبة هذه المقالة لم تكتمل تماما و لها بقية ان شاء الله و بعض التعديلات و لكنى احببت نشرها حاليا على هذا الوضع

نزهة الرائي لما وقع بين يديه من الماضى

 بسم الله الرحمن الرحيم 

ملحوظة
المقالة دي هى عبارة عن رأي شخصى مزود بالمصادر العلمية من كتب التاريخ و مقالات الأنترنت ... انا منقلتهوش من حد دى مقالة انا كاتبها بنفسى ... و هذا العمل اشبه ما يكون ببوستات الفيسبوك اللى انا كنت بكتبها و لكن على اكبر شوية ... فهتلاحظوا كثير من العامية يا حضرات ... الحاجات دى قابلة للنقاش طبعا و يا ريت لو حد يناقشنى فيها و يزود عليا او يقولى غلطى فيها ... طبعا بأسلوب علمى بالأدلة يا ريت او يستفسر منى عن تفاصيل اكبر فى اى نقطة هو عايزها ... لأن المقالات اللى من النوع ده هي برضه سرد للى انا بتعلمه مع نفسى من علم التاريخ و هكون سعيد جدا لو حصل ان حد طلب انه نتعلم سويا و نتناقش مناقشة كاملة على الجروب عندى فى الفيسبوك ... و ده احد اهم الاهداف الكبيرة ليا من المدونة و الفيسبوك و هو انى ازود معرفتى فى التاريخ بالذات بكثير من المناقشة
جروبى على فيسبوك
https://www.facebook.com/groups/Esterlab2017/
.....................................................................................................................................................................

دلوقتى حضراتكم هل تعرفوا اية اللى هيحصل فى المستقبل ؟؟ ... اكيد لأ ده من علم الغيب ... طب حضرتك هل تعرف اية اللى بيحصل انهرده فى بلد تانية من غير اخبار التليفزيون ؟؟ ... اكيد لأ ... طب تعرف اية اللى بيحصل اساسا فى الأوضة اللى جمبك من اخوك او والدك ؟؟ ... اكيد لأ ... طب تعرف ادق التفاصيل اللى بتحصل بره فى الشارع و انت بتقرأ المقال ده ؟؟ ... اكيد لأ طبعا ... طب هل تعرف اية اللى حصل زمان من اول العهد الفرعونى لحد مثلا المماليك بدون ما تقرأ كتب التاريخ اكيد لأ ... 

و من هنا كانت قناعتى الشخصية ان الماضى و الحاضر و المستقبل متساويين تماما ... منعرفش عنهم شئ ... و لينا ادواتنا جميعا فى البحث فى التلاتة ... نقدر نتنبأ بالمستقبل بشكل علمى فى اخبار الطقس مثلا ... نقدر نتوقع اية اللى هيحصل لكن منعرفش برضه بالتفصيل اساسا ممكن يكون صح و ممكن يكون غلط ... نقدر نتنبأ باللى بيحصل دلوقتى مثلا فى امريكا بناء على ما يفعله الرئيس الامريكى ... نتوقع هل يدخل العراق محتلا ام لا ... نتوقع هل سيكون هناك حرب مع العراق ام لا ... توقعات بناء على اخبار نأخذها مثلا من الاعلام او توقعات حتى من الدبلوماسيين من تصرفات بعضهم البعض فى ايامنا هذه ... لكننا لا نعلم و من الممكن ان يكون توقعتنا صح او غلط ... كذلك الماضى تماما ... اخباره تبين لنا ما يحدث فى تلك الازمنة البعيدة عنا ... لكننا لا نعلم بالتفصيل ما كان يحدث الا عندما نعرفه من كتب التاريخ او الاثار او الاخبار القديمة بأى وسيلة كانت ...

حتما و لا بد فكل الماضى و الحاضر و المستقبل متساويين جميعا فى هذه النقاط ... و عشان كده لفت نظرى موضوع اثر بشدة على التلاتة و هو موضوع العلوم ... تجد احيانا العلوم متقسمة بين العصور دى ... مفيش عصر زى التانى تقريبا فى العلم ... او زيه فعلا ... لدرجة انك ممكن تلاقى شئ فى الماضى متقدم عن شئ فى الحاضر ... او شئ بالمستقبل ... لأن تم اهمال علوم معينة ... فمن هنا كان بحثى الشخصى فى العلوم دى و تأثيرها على دلوقتى ... و كانت دايما العلوم القديمة مهمة لفهم الحاضر او حتى تطويره او الأضافة كماااان عليه ... 

فى بحثى الصغير ده المفروض انى بخليك تعشق حاجه اسمها تاريخ او اثار ... فقبل ما تقرأه انا عايزك فعلا تكون ليك صبر انك تخلصه ... و ان شاء الله هتقتنع ان مش بس هتحب التاريخ و الاثار و لكن كمان هتشجع انهم ينتشروا و الناس تدور فيهم و تصرف فيهم فلوس اكتر من كده ...

دلوقتى العلماء وقت ما بيدرسوا العلم لابد العلم ده انه يكون احد تلت صور انا لاحظتها الصور التلاتة دى هى كالاتى :

1- ان العلم ده يكون تكملة علم سابق

ده الطبيعى اللى كلنا عارفينه ان معظم ما وصلنا انهرده من علوم و اختراعات تم اختراعها هى نتاج خبرات كبيرة جدا منذ مئات السنوات و احيانا الالاف ... كل الحضارة اللى احنا فيها انهرده دى وصلت بعد سلم طويل و شاق جدا من الاختراعات و التجارب و فيها العلماء كملوا على شغل و اعمال السابقين حتى وصلنا ما وصلنا اليوم ...

اكبر الأمثلة على ذلك هو مثال العباسيين 

فى النهضة العلمية اللى حدثت فى العصر العباسى نقلت بل و طورت كمان فى العلوم اليونانية و العلوم العباسية المتطورة من ما حملته من العلوم اليونانية و قد حدث ان تم الابتكار ايضا من العباسيين و المسلمين فى جميع بقاع الدولة الاسلامية من هذه العصور و تم تطويرها فى اوروبا و اسيا بمرور الوقت و تم لنا فى النهاية ان نرى الحضارة و التقدم كما نشاهدهم اليوم فى الطفرة التكنولوجية التى نعيشها جميعا ...

حدث ان قام الخليفة المأمون ... خليفة الدولة العباسية ... ان قام بطلب من الامبراطور البيزنطى بطلب بعض كتب العلوم اليونانية المكدسة لديه و قد حدث ذلك و تم ترجمة هذه الأعمال و نقلها لبلاد العرب للأستفادة بها فى بيت الحكمة 

وهذا مكتوب فى مقالة عن بيت الحكمة بوكيبيديا العربية بمصدر لهم نقلتها بوقت كتابة المقالة ( هذا لأن مقالتهم تتجدد بأستمرار و هذا جيد طبعا )

طبعا حاجه زى كده لم تنقل و فقط و لكن تم اقصى استفادة بها من العلماء المسلمين فى ذلك الزمان فتم دراسة هذه العلوم و تطويرها و لعل ابرز ما وجدته و اثار اعجابى هو هذا الاختراع العظيم ... الأسطرلاب ... الأسطرلاب هو الة تم اختراعها فى العصر البطلمى على اغلب الأقوال و ظهر فى الأسكندرية فى مصر ...

هذا الاختراع هو عبارة عن  نموذج ثنائي البعد للقبة السماوية، وهو يظهر كيف تبدو السماء في مكان محدد عند وقت محدد. وقد رسمت السماء على وجه الأسطرلاب بحيث يسهل إيجاد المواضع السماوية عليه ... و طبعا هذه الألة تعتبر احد اوائل الكمبيوترات فى العالم القديم لما تفعله من كذا ميزة اخرى كتحديد الاتجاهات فى البر و البحر و بذلك معرفة اتجاه القبلة و ايضا معرفة الوقت ... مش عارف اذا كان هذه الميزات قد ظهرت كلها على ايدى المسلمين كتطوير و لكنى متأكد تمام التأكد ان السبب الرئيسى فى معرفة الوقت من الأسطرلاب هم المسلمين فى العصر العباسى ... و قد تم ذلك و عرفوا الوقت كما نعرفه اليوم بالضبط ... فكانوا يستخدمونه بالليل عن طريق النجوم و فى النهار عن طريق الشمس و يكون بالضبط كما نعرفه هذه الأيام و لكن بحسابات بسيطة ... و قد صمموا بعض الأسطرلابات للجيب ... و بكده تم اختراع الساعة و ظهرت فيها كتب لا تعد و لا تحصى لتصميم الساعات و اتكتبت احيانا كده كعناوين للكتب ... تصميم الساعات ... حتى جائت عصور لاحقة و حولتها لشكلها الميكانيكى بالعقارب للدقائق و الساعات زى ما هى معانا انهرده ... حتى انك تقدر تعرف اتجاه القبلة انهرده من ساعتك عن طريق حسبة بسيطة تماما كما كان بالأسطرلاب ...

تقدر تشوف الكثير من المخطوطات و الكتب القديمة عن الأسطرلاب و كيفية صناعته و عمله و هى متاحة للتحميل بالمجان على الأنترنت لو بحثت عنها بكثير من المواقع و وقع تحت ايدى هذا الكتاب و هذه بعض منه

لمن يريد معرفة هذا الاختراع بصورة افضل انصحه 

بحلقة رقم 10 من برنامج خواطر الجزء 6 بعنوان رولكس المسلمين 

طبعا الحركة بتاعت الترجمة اللى حدثت فى عصر الخليفة المأمون كان ليها اثر عظيم فى قرون لاحقة ... ليه ؟؟ ... عشان طبعا وقت العصور الوسطى فى اوروبا مثلا اوروبا لم تكن متقدمة كفاية و كانت بتنقل العلوم من المسلمين و بعد انتهاء العصور الوسطى و بداية عصر النهضة استقدموا الكثير من الكتب العربية لدراسة اللغة العربية و الاستفادة من العلوم المترجمة باللغة العربية و للاستفادة من العلوم التى طورها العرب و هناك بعض الكتب التى تحكى عن ذلك بأسلوب علمى مثل كتاب ( حكمة الشرق و علومه : دراسة العربية فى انجلترا فى القرن ال17 الجزء الأول )

لو جبت صفحة 134 من الكتاب ستجد فيه الاتى 

و هذا يعتبر من اكبر الأدلة على بذل الغالى و النفيس لشراء و جمع الكتب العربية او غيرها بأى وسيلة من بلاد المشرق سواء عن طريق الشراء او السياسة او غيره ...

2- علم يكون تم ابتكاره غير معتمد على اي خبرات سابقة 

لعل ابرز ما ذكر فى التاريخ عن هذا النوع من العلوم هو ما قام به اينشتاين من اوراقه البحثية و ظهر تفاسير جديدة و اختراعات جديدة بناء على ما كتب زى القنبلة النووية مثلا ! ... هذا سلاح دمار شامل لم يكن موجودا من قبل و هو تم بناء على علم لم يكن فى ايدينا قبل ذلك و اساسا اينشتاين غير الفيزياء تماما و قلبها رأسا على عقب بسبب اوراقه البحثية الاربعة الشهيرة التى لم يرجع فيها لأى احد من اساتذته او زملائه او حتى كتب نقل منها ذلك ...

فى مقالة اينشتاين نقلا عن وكيبيديا العربية ( نقلتها وقت كتابة المقالة )

و احد برضه الاختراعات اللى اتوجدت بناء على علوم مكانتش موجودة هو الكمبيوتر ... و ان كانت لغات البرمجة هى نتاج لعلوم قديمة و لكن الاختراع نفسه جديد ... فكرته جديدة تماما وقت ما ظهر فى الحرب العالمية التانية من العالم البريطانى آلان تورنغ ... هو كان جهاز يقوم على خوارزميات لفك شفرة رسائل النازيين فى الحرب العالمية الثانية التى لم يكن من الممكن فك شفرتها ابدا انذاك و من المستحيل فعل ذلك اصلا الا بهذه الطريقة فى اختراع الة تقوم على حل جميع الفرضيات سريعا التى من الممكن ان تأخذ ملايين السنين ... و فى فيلم سنيمائى مخصوص بيحكى قصته هو فيلم The imitation game  و بيحكوا فيه كيف تم اختراع اول كمبيوتر تسبب في وصول الكمبيوتر لما نحن عليه اليوم ...

و هناك علم من العلوم التى ظهرت لم يكن هناك اى فكر على ان تظهر على الأطلاق ... كالطيران مثلا فهذه الفكرة ... الطيران ... لم تكن موجودة عندما قام بها عباس بن فرناس و طار من فوق مأذنة قرطبة ... فتم ذلك الا انه اخطأ فى بعض الحسابات الخاصة بالذيل مما تسبب فى النهاية عدم اكتمال الفكرة الا انه بالفعل طار لكنه لم يهبط جيدا و تم بدلا من ذلك اختراع البراشوت مثلا فهو يعتبر اول من اخترعه ... 

و كترشيح لسماع بعض المعلومات عن ذلك حلقة 14 من خواطر 6 لأحمد الشقيرى 

عايزين برضه نقول اختراع التليفون و ما تسبب فيه من ثورة هائلة فى التواصل بين الناس و بعضهم البعض ... التليفون مكانش موجود قبل كده و ظهوره ادى وجود علوم الأتصالات اللى بقيت موجودة فعلا بشكل كبير جدا انهرده و كل يوم بتتطور ...

فنلاحظ هنا من الأمثلة دى هى امثلة لعلوم جات من تجارب جديدة ليس لها علاقة بالماضى اطلاقا او اختراعات جات بناء على خيال المخترع او بناء على حاجته و طلع من الاختراعات دى علوم جديدة اتطورت و بقي ليها ابحاث علمية متخصصة ... فعلا الحاجه ام الاختراع ...

 

3- علوم قديمة كانت متاحة فى الماضى و اندثرت او ضاعت او افكار قديمة لم يتم تطويرها و عدم الاستفادة بها

هنا بقى العلوم دى معرفش اذا كانت بتدرس بالطريقة اللى انا بتخيليها و لا لأ ... اساسا النقطة التالتة دى اللى احنا فيها و بناقشها هى السبب الرئيسى للمقال ده ... 

بس مثلا هنمسك موضوع متكرر كبداية و هو الأهرامات 

الأهرامات حوليها الكثير من التساؤولات العلمية ... لأن طريقة بناءها لم تصل الينا ابدا ... لا مخطاطات و لا كتابات كاملة تصف كيف تم نقل الاحجار او كيف تم رصها او كيف تم ايا من ذلك و بدلا من ذلك وصلنا انها بنيت مثلا فى 20 عاما ... بعض التساؤولات حول الأهرامات ...

1- كيف تم بناء الهرم من الأساس بهذه الدقة بأدوات بدائية ؟

2- هل تم بناؤه من الصخور فعلا ام من مادة تشبه الخرسانة و لها شكل الصخور ؟

3- ان الهبوط فى التربة لهذه الأوزان للهرم على مر السنوات ال4000 لم يتجاوز تقريبا الانش الواحد فى التربة ... كيف حدث ذلك و كيف تمكنوا من دراسة التربة بهذه الدقة ؟

4 - لماذا استغرق بناؤه 20 عام ؟

5 - كيف تم رص الأحجار نفسها بهذه الدقة ؟

فى الفيديو ده انا لقيت طريقة علمية لبناء الهرم و شرح كرتونى شبه تفصيلى لعمليات البناء و صاحب الفيديو بيقول انه عمل بالفعل كتاب بيشرح فيه حصل ده ازاى و كمان بيستدل على كده ببعض الاثار بجانب الاهرامات و بيقول ممكن يكون تم استخدام الحاجات دى فى بناء الهرم ...

لك ان تتخيل ان النظام اللى عمله فى ناس بتقوله فى الكومنتات ان النظام ده اصعب من بناء الهرم نفسه ... ممكن يكون عندهم حق و لكن الجانب المشرق ان علماء من الدنيا كلها بيبحثوا فى الأمر و ده ممكن يتسبب فى كيفية بناء الهرم و بالتالى استخدام علوم قديمة ممكن تفيدنا انهرده او حتى استنباط علوم جديدة او اختراع اختراعات بناء على علوم قديمة ممكن تسهلنا دنيتنا اكتر الايام دى و تكون ممكن كمان طرق ارخص من الطرق اللى بنستخدمها انهرده و تتتسببلنا فى توفير طاقة و فلوس ....

لحد هنا انا شايف ان دى فكرة كويسة فى احياء علوم الماضى او حتى التفكير فيها بأسس علوم الحاضر و تخيل المستقبل بعلوم اكثر تطورا بكل ذلك 

لكن الغير مفهوم فعلا مثلا لما نيجى لفكرة الطيران اللى احنا اتكلمنا عنها دى ... الفكرة دى ممكن الناس كانت بتفكر فيها على خفيف و لكن محدش فعلا فكر انه يطير بنفسه غير لما جه عباس بن فرناس فى قرطبة فى الأندلس فى القرن التاسع الميلادى و بعدها حسب وكبييديا العربية بيقولوا ان فى واحد اسمه المر المالمسبورى حاول الطيران فى انجلترا فى بين سنة 1000 و سنة 1010 ميلادية ... و بعدها يظهرلنا ناس فى اوروبا بعد مئات السنوات فى عصر النهضة فى ايطاليا نموذج يشبه الهليكوبتر و طائرة اخرى من ليوناردو دافينشى و يظهرلنا فى اسطنبول زى هزارفان شلبى ايام السلطان مراد الرابع العثمانى و يظهرلنا بعد كده المانى زى اوتو ليليانذال و يظهرلنا الأخوان رايت لحد ما وصلنا الفضاء ... بس اللى يعصب فعلا ان المحاولات دى كلها تقريبا مكانتش تعرف بعضها خالص ( و الله اعلم ) ... بدليل ان مفيش اى رابط يذكر بين المحاولات دى و بعضها البعض بل ان كل واحدة فى احيانا بينها و بين المحاولة التانية مئات السنين و صحيح عباس بن فرناس عمل علوم للطيران بحسابات و لكن محدش طورها من بعده برضه مثلا ... و الوحيدين اللى محاولاتهم تم تطويرها الاخوان رايت و جايز ده يكون بسبب الافتقار لبعض التكنولوجيا و لكن فين مثلا تفكير الناس دى سواء عرب او انجليز او اتراك او المان من تنفيذ تجارب لناس تستخدم مثلا الحاجات دى فى المعارك و الحروب او حتى للترفيه ؟؟ !!! ... ثقافات غريبة كانت منتشرة و مستمرتش ليه مش عارف ... مع ان لو حد كان فكر و سمح للعلوم دى بالاستمرار كان زمنا فى وضع تانى دلوقتى مختلف ...

امسك مثلا الحتة دى ... الخليفة المأمون ... الراجل ده جه مصر و زار الأهرامات و دخل حجرة دفن الملك ليجد المقبرة خالية تماما و قد نهبها اللصوص ... حسب ما هو موجود فى كتاب (  بيت الحكمة، كيف أسس العرب لحضارة الغرب، جوناثان ليونز ص98 )

هنا احنا بنجد ان الخليفة المأمون اللى بيشتهر بأنه عالم و كان مهتم بالعلوم و بتأسيس اكبر مكتبة عربية عبر التاريخ الاسلامى القديم و اكثرها قيمة جه مصر و حاول يفك طلاسم اللغة الهيروغليفية و لكنه فشل ليه محاولش حد بعده انه يحاول فى الموضوع ده و القصة دى حدثت بالصدفة بعد كده ايام الحملة الفرنسية على مصر ؟!!! ... مفيش محاولة تذكر للقصة دى و لا تنقيب عن مزيد من الاكتشافات ... !! غريبة ..

احد المواضيع برضه المشابهه قناة السويس ... قناة السويس احد اكتر المصادر المبكرة اللى ظهرت ليها كانت ايام العثمانيين فى عصر السلطان سليم الثانى بن سليمان القانونى ... و قد ورد ذكره فى كتاب ( رياس البحر الهندى : عصر الاستكشاف العثمانى ) صفحات 231 و 233 و  234 من نسخة عالم المعرفة المترجمة ... و هذه من بعض ما جاء فى صفحة 233 ...

و بعد كده بيذكروا فى بقية الموضوع ان الفكرة رفضها المهندسين بعد كده و قالوا باستحالة تحقيقها مع ان المهندسين فى الوقت ده كانوا بلغوا مبلغ علمى لا بأس به فى موضوع زى ده و الايام اثبتت بعد كده ان القناة مش مستحيل تحقيقها و لا حاجه لكن حتى موضوع زى ده رغم ان العثمانيين كانوا محتاجينه جدا جدا الا انه استحال تحقيقه بعد كده بسبب ضيق افق المهندسين اللى حتى محاولوش يفكروا فى طريقة يحلوا بيها الموضوع و اكتفوا بأن القصة مستحيل تحقيقها ... ماشى نقول علمهم وصل لحد هنا ... ليه متمش فى السنوات اللاحقة التفكير فى موضوع زى ده من العثمانيين ؟؟!! ... ليه محاولوش تانى ؟؟ ... مشاكل سياسية و اقتصادية كتير كانت هتتحل بسبب شئ زى ده ... و الحج كان هيبقى اسرع و اسهل و اغلى بالمناسبة ... يعنى هما كانوا هيستفيدوا تماما من التجربة و كانوا هيستفيدوا من زيارة الاماكن المقدسة و الاقتصاد هيرتفع بسبب ذلك و لكن بسبب المشاكل السياسية الطويلة لم يفكر فيها اى احد من الوزراء اللى جم بعد كده فى الدولة تقريبا ... و ممكن حد يقولى انت بتبالغ و لكن الفرنساويين مكانش رأيهم كده بصراحة لو هتقولولى ببالغ ... لما درسوا الموضوع و قالوا برضه انه مينفعش مثلا مستسلموش رغم كده و لكن ظهر دليسبس و قال ينفع انها تتعمل ... و ده دليل على اجيال من المحاولات لعمل انجاز هندسى و فكرة قديمة ظهرت و كانت هتحل مشاكل كتير و استحال تحقيقها ....

نلاحظ هنا من مقالة وكيبيديا العربية عن قناة السويس ( وقت كتابة المقال )

نلاحظ ان الفرنساويين قالوا اساسا مستحيل برضه و لكن مستسلموش ابدا و حاولوا مرة و التانية و التالتة لأن الموضوع هيحل مشاكل كتيرة جدا ... للأمبراطورية التى تحكم مصر ايا كانت ...

و لو كملت المقالة هتعرف حاجه غريبة جدا ...

و تعرف الغريب اية بقى ؟؟ ... ان اساسا كان فى قناة تربط البحر الأحمر بالنيل و منها تخرج على البحر المتوسط ... الغريب ان القناة دى كانت شغالة و معروفة بخليج امير المؤمنين فى العصور الاسلامية المبكرة فى مصر و حتى كمان كانت موجودة فى العهد الفرعونى ايام سنوسورت التالت مما يدل على انها معروفة للناس من قديم الأزل و اتعملت و استخدمت عادى مئات المرات  و مع ذلك لم يتم التفكير ابدا فيها فى مسألة تدعوا لأشد العجب ممن كانوا مسؤولين عن ذلك العمل الهندسى ... كان افقهم ضيق جدا جدا جدا ...

ممكن تقولى مكانوش يعرفوها برضه او سمعوا عنها فى الفترة دى ... ماشى ... معاك ... بس مصرفوش فلوس على البحث العلمى او سألوا او دوروا برضه عن معلومات رغم انها كانت موجودة تاريخيا برضه ... محاولوش ابدا

و هنا لو هتختلف معايا فأنا على الأقل من وجهة نظرى بدلا من الجدال فى هذه النقطة انا بقولك ناخد الحادثة دى عبرة و عظة لعدم الجمود و نستفيد بخبرة زى كده فى ان اي قرار مصيرى زى ده نشوف هل حدث زمان زيه فى اي مكان و لا لأ ... لو عنصر واحد من مجموعة عناصر فى الفكرة استفدنا بيه احنا الكسبانين طبعا ... احنا جايين نستفيد من التاريخ و نتفادى اخطاء الماضى او نطور من فكرنا الحالى مش لازم ابدا اننا نتخانق على شئ مش هيقدم و لا يأخر ... يعنى سواء هما كان سهل عليهم يجيبوا المعلومة و لا لأ مش هتفيدنا على اد ما هنستفيد اننا فى عصرنا الحالى على الاقل نقدر نجيب المعلومة فهما لو معذورين فأحنا لأ ...

 

احد المعلومات اللى شخصيا كنت اعرفها و كنت مستعجب منها هو موضوع الصفر ... الصفر كرقم محدش كان بيستخدمه و هو اختراع على اد ما حضراتكم ممكن تشوفوه بسيط الا انه فى منتهى الأهمية و بانت اهميته فى اياما هذه و الخبراء فى الرياضيات يحكولكم عنه ... على معلوماتى الشخصية الصفر تم عمله كرقم فى حضارة المايا قبل الكثير من الأمم لحد ما جه الخوارزمى و عمله رقم ... و لكن لعدم اتصال حضارة المايا بالعالم اضاع هذا المجهود فكانوا منغلقين على نفسهم فى القارة الامريكية و هذا تسبب فى ضياع علم و استغرقنا سنوات لحد ما نعرف الصفر فعلا كرقم ... و كمان محدش اكتشف الموضوع ده غير بالصدفة لأن محدش دور مخصوص عليه طبعا لأن محدش يعرف اساسا انه كان موجود ... فضرورى فعلا يكون فى بحث و استكشاف على الدوام لسبب زى ده ...

كنت قريت على الانترنت موضوع يلفت النظر لشئ فى منتهى الأهمية من الحضارة الفرعونية ... موضوع تقدم الجراحة فى مصر الفرعونية 

لقراءة هذا المقال

الموضوع ده بيشرح اد اية تم تركيب مسمار فى الركبة لواحد من مصر القديمة بطريقة مشابهه لما هو عليه اليوم من الأطباء ... انا مش بقولك انك اول ما هتكتشف ده هتتقدم فى الطب فورا و لكن على الاقل هيلهمك انك تبحث و تدور لأن الموضوع حصل و مهواش شئ مستحيل ... زى بالظبط قصة الأهرامات ... احنا منعرفش اتبنت ازاى و هى قدامنا من 4000 سنة لكن ده شئ يخلينى ادور ان دى حاجه حصلت فعلا و علومها مش عندى فأدور و اشوف و احاول و اعرف جايز اغير حياة بنى ادم للأفضل ...

 من العلماء اللى عملوا مخترعات بناء على العلم زمان و اختراعاتهم دى معظمها مشفش النور مع انها ظهرت بعدهم بسنين طويلة كان الجزرى فى العصر العباسى و ليوناردو دافينشى فى عصر النهضة فى ايطاليا

و هنا اكبر دليل ان التاريخ القديم حتى و لو مكانش متقدم فهو دليل كبير جدا ان اكتشافاته ممكن تغير العالم اللى احنا عايشين فيه ده لأبعد مما نتخيل جميعا فتعالى عد معايا الاختراعات الجاية دى

الروبوتات :

كلنا عارفين ان الروبوتات اختراع حديث بيشتغل بلغات البرمجة الحديثة لكن اللى ممكن الناس متعرفهوش ان الجزرى اخترع الروبوت فى الدولة العباسية قبل حوالى اكثر من 9 قرون ... قام بالفعل بأختراع الروبوتات الاتية :

روبوت فى شكل غلام منصب يمسك فى يده إبريق ماء، وفى اليد الأخرى منشفة، وعلى عمامته طائر، وعند موعد الصلاة يصفرالطائر، ثم يتقدم الخادم نحو سيده، ليصب الماء فى الإبريق بمقدارمعين، وعقب الانتهاء من الوضوء يقدم له المنشفة، ثم يعود إلى مكانه

كما ابتكر الجزرى آلة فى شكل "نادلة" لتقديم الشاى والماء ومختلف المشروبات، حيث كانت تقوم بتخزين المشروبات فى خزان معين، ثم تقوم بصبه فى وعاء، كما ابتكر الجزرى آلة لغسل اليدين تعتمد على التدفق المفاجئ للمياه، وقد تم استخدام هذه الفكرة فى تصميم مراحيض التنظيف الحديثة وقد تمثلت هذه الآلة فى هيئة أنثى تقف فى حوض مملوء بالماء، وبعد قيام المستخدم بغسل الأيدى وسحب الرافعة تقوم مصارف المياه بمساعدة الأنثى الآلية بإعادة ملء الحوض مرةً أخرى

ده طبعا غير روبوتات تانية صممها زى الروبوت اللى عمله عشان تغسل ايدك مثلا بأنتظام بمواعيد معينة 

كل روبوتاته دى موجودة فى كتاب مخطوط ليه اسمه ( الجامع بين العلم و العمل النافع فى صناعة الحيل ) و هو موجود على الانترنت للاستفادة...

تقدروا حضراتكم تشوفوا نسخة على الانترنت من اللينك ده و مليان اختراعات عجيبة بالنسبة للزمن اللى كانه فيه الجزرى مما يدل على عبقريته و فى منها اختراعات تم استخدامها تقريبا فى جميع انحاء العالم فى العصور الوسطى
لتصفح الكتاب و تنزيله من هنا

و كان اليوم السابع مرة كتب عن الموضوع ده لقراءة الموضوع على اليوم السابع
و موقع قناة العربية من هنا

اما بقى ليوناردو دافينشى فأخترع روبوت هو عبارة عن محارب، يرتدي الدروع الألمانية الإيطالية في العصور الوسطى، وهذا هو على ما يبدو قادر على إجراء العديد من الأعمال التي تشبه الإنسان. وتشمل هذه الأعمال الجلوس وتحريك سلاحه وتحريك رقبته وفكه أيضاً. 

الروبوت ده اتعمله كتاب بيتشرح فيه الية عمله و كيفية صناعته طبقا لتصميمات ليوناردو دافينشى و هو شغال عادى 
لينك عن الكتاب
للمزيد من هنا

الروبوتات اتعملت من اكتر من 9 قرون و برضه محدش استخدمها على مدار السنين دى كلها كما نتخيل و كمان محصلش فيها تطوير عظيم الا فى هذا العصر الذى نعيشه و كمان ما زالت مجتمعات كتير مبتستخدمش الالات دى رغم ما توفره من رفاهيه فى حياتنا جميعا ....

الدبابة :
ظهرت الدبابة لأول مرة فى الحرب العالمية الأولى و ظهر العمل بيها و استخدامها فى المعارك ... مع ان اساسا كونسبت الدبابة ابتكره ليوناردو دافينشى فى سنة 1487 ميلادية 

بدلة غطس :

بدل الغطس ظهرت فى العقد الثانى من القرن ال18 الميلادى على يد المخترع جون ليثبريدج ( حسب وكيبيديا الانجليزية عن مقال John Lethbridge )

غريبة طبعا لأن ليوناردو اخترعها قبلها بقرنين حوالى سنة 1500 ميلادية 

و غيرها كتير ليوناردو دافينشى و الجزرى عملوا العجب و فى حاجات من اختراعاتهم متطورتش و لو بحثنا كتير هنلاقى ان فى حاجات كتير عملوها و استخدم بعضها و البعض التانى يأما توقف التطوير فيه كما حدث فى مخترعات الجزرى و بعضها ضاع اصلا زى مخطوطات ليوناردو دافينشى و كانوا دايما بيدوروا على تطوير لبعض المخترعات زى :

الطيارة الهليكوبتر : 

اللى ليوناردو دافينشى رسمها قبل ما يتم استخدام اول لفظ لهليكوبتر فى القرن ال19 لمحاولات لبناء طيارة تطير بشكل عمودى 

الالة الحاسبة :

لا توجد معلومات مؤكدة حول ما اذا كانت الالة الحاسبة من اختراعه و لكن يرجح انه عمل الة حاسبة و دى المخطوطة بتاعتها اللى محدش يعرف اذا كان هو كتبها و لا لأ 
معلومات بسيطة عن هذا الاختراع من هنا

المهم طبعا هو ان تم اختراع الة حاسبة فى القرن ال16 قبل ما يخترعها باسكال و يتعب فيها و يخلصها سنة 1640 ميلادية فى القرن ال17

طبعا هتفتكرنى كده خلصت ... لأ 

ليوناردو دافينشى حضرتك كتب فى التشريح و الطب و فى رسومات تفصيلية لتشريح الجسم البشرى و بعض الحيوانات فى مخطوطات ليوناردو دافينشى فى القرن ال16 شبه التشريح اللى معانا انهرده بصورة كبيرة للجسم البشرى

ده غير البراشوت اللى اخترعه عباس بن فرناس و اخترعه ليوناردو دافينشى برضه

نلاحظ دايما وجود اكتر من مخترع لنفس الحاجة بسبب ان محدش بيستخدم العلوم القديمة او بيتداولها فتلاقي ان حد تانى استخدمها بعد كده و المشكلة هى انى حتى مش ملاحظ تاريخيا اي استخدام للبراشوت حتى من فوق الجبال لأن دى حاجه كانت ممكن تبقى مفيدة خصوصا فى المعارك لكن لم يتم استخدامها تقريبا الا فى العصور اللاحقة بعد ما تم اختراع الطيارة و لكن ده ان يدل فهو يدل برضه على ان المجهود مراحش على الفاضى تماما لأن بعد كده تم استخدام الاختراع بتوسع و لو بعد مرور مئات السنين ...

لو حابب تقرأ اكتر عن اختراعات الجزرى و ليوناردو دافينشى و رسوماته اقرأ الاتى :

1- كتاب : الجامع بين العلم والعمل النافع في صناعة الحيل للجزرى

و ده لينك للمخطوط الأصلى تصفح من هنا

2-  للقراءة عن مخترعات ليوناردو دافينشى و باللغة الانجليزية

3 -  للأطلاع على رسومات ليوناردو دافينشى الطبية باللغة الانجليزية 

 و يوجد بعضها فى الكتاب السابق 

اعمال الجزرى و ليوناردو دافينشى و عباس بن فرناس تحسسك فعلا انه تم السفر بالزمن هههههه مش زى ما بيقولوا صور الفراعنة و شكل الطيارة الهليكوبتر الحديثة فى سوهاج على جدران المعابد اللى ليها تفسير حضراتكم و طبعا لو كانت رسومات لطيارات و غواصات و خلافه لكان تم ذكر اى شئ من استخدامها و لكن ذلك لم يحدث ابدا حتى فى نفس المكان اللى ظهرت فيه الرسومات دى  و لكن هو تداخل توقيع الملكين سيتى الأول و رمسيس الثانى و انا بدلا من اقتناعى بالسفر بالزمن انا بقول ان دى اجمل صدفة فى التاريخ

مع انى شخصيا شايف ان صورة زى دى مقنعة اكتر للاقتناع فى السفر بالزمن  ... و هى رسمة من رسومات الكهوف تقريبا بتشرح اول مرة اتلعب فيها كرة قدم ههههههه

طبعا دى صور حقيقية و مفيش سفر بالزمن طبعا و لا شئ من ده

لكن فى موضوع بعده هحس ان السفر بالزمن حصل برضه هههههه ..

موضوع الطاقة ... ايوة الطاقة يا باشا ... تخيل لما تكتشف ان فى طاقات بنستخدمها انهرده تم استخدامها فى السابق و لكن السبب مجهول ... زى الكهربا مثلا ...

حسب وكيبيديا العربية فى مقالها عن البطاريات ( فى وقت كتابة المقال ) فقد ذكروا حسب مصدر ليهم ان طاليس العالم الأغريقى الذى عاش فى القرن السادس قبل الميلاد تمكن من انتاج ومضات كهربائية بسيطة عن طريق حك قطعة من القماش بالكهرمان ... فوصل للكهربا و لكن على ما يبدو استغرقنا قرون لتطويع الطاقة دى و اننا نفهمها ... لكن ...

فى اخبار بتقول ان تقريبا الكهرباء وصلت لحضارات قديمة بصور تشبه تماما الصور اللى احنا فيها الأيام دى ...

فمنذ العهد الفرعونى مثلا هناك استنتاجات علمية كثيرة على هكذا موضوع و تم تفسير هكذا مواضيع بطريقة اكبر عند اكتشاف بطارية بغداد  اللى بتعود للقرن التالت قبل الميلاد ...

بحثت كتير على صورة ليها فى المتحف بتاعها فى العراق ملقتش ... لحد ما وجدت صفحة من rt الروسية بتقول انه البطارية اتسرقت وقت الغزو الأمريكى على العراق مما يفسر عدم وجود صورة ليها ... الخبر

و كانت البطارية احد اكبر الألغاز اللى اتحط عليها نظريات و انا شخصيا معجب بيها جدا و منبهر ... و تم عمل نموذج ليها بالفعل و وصل الأمر انها خرجت نص فولت و بعد كده وصلت لقرب ال1 فولت ... طبعا دى حاجه عظيمة جدا ... انا الصراحة مبسوط لوجود معلومات علمية بالصورة دى ...

و كان اغلب ما تم ترجيحه هو استخدامها فى طلاء المعادن بالذهب او فى طقوس العبادة او العلاج بالابر ... و لكن كل ذلك لم نجد له دليل ملموس و كلها مجرد نظريات جائت نتيجة لهكذا كشوف ...

و احد اجمل المواضيع اللى تكلمت عن هذا الموضوع هو الموضوع التالى و هو فى مدونة قد لا اكون متفق على بعض ما جاء فيها و لكن الرجل كتب مقال علمى يحترم و مدعم بالمصادر اللى هدور وراه فيها بشكل اكبر  ... و احب اقول بصراحة انه من اكتر المقالات الملهمة على بساطته الشديدة لكنى فى حاجه للبحث اكثر فقد لا اقتنع فعلا بكل ذلك و لكن بعض ما جاء فيه كبطارية بغداد ... و بيحمل اللينك بتاع المقال ده ادلة و استنتاجات قد تكون مقنعة انه تم بالفعل استخدام الكهرباء فى مصر القديمة و تتسبب اكتر فى اقتناعك بالسفر بالزمن هههههه  لينك المقال 

احب ان اوضح اننى فعلا لا أؤمن بالسفر عبر الزمن لأن شيئا كهذا قد يكون مستحيلا علميا و عقليا مما نجد فيه الكثير من المعضلات و الاشكاليات و على الرغم من ذلك فأنه نظريا نستطيع السفر للمستقبل فقط و لا نستطيع الرجوع للماضى ... و هذا بطرق مختلفة و متنوعة ابرزها و اشهرها مثلا نظريا موضوع السبات او الhibernation و فى كائنات بالفعل بتستخدم النوع ده ... و احنا اساسا من وجهة نظرى وقت ما بنام و نصحى فده سفر بالزمن على مجال صغير و هناك بالفعل من نام نوم عميقا قبل ذلك استغرق ايام ... و بالفعل لو انت فقدت الذاكرة بتاعتك مثلا لكام سنة من عمرك و سألوك اية تاريخ انهرده فتبين ان دماغك فاهمه ان فى خمس سنين من عمرك مثلا مش موجودين فهذا يعتبر شبيها جدا ببعض نظريات السفر بالزمن ... طبعا ده لتقريب وجهات النظر و ايضاح ما المقصود بالسفر بالزمن ... و بعض النظريات ممكن تخليك تسافر عشرات السنوات و لكن لا رجوع و استحالة تطبيق النظريات دى لأسباب مختلفة و لكنها موجودة على الورق بالفعل ... و ليس بركوب الة زمن نستطيع من خلالها العبور مرارا و تكرارا الى الماضى و المستقبل بأريحية كما يعتقد البعض بسبب الخيال العلمى ....

هذا كان ضروريا فقط لأيضاح لمن يؤمن بالسفر بالزمن ان المقالات و الحاجات دى  اللى انا شيرتها مش مقصود منها ابدا اقناعك بفكرة السفر بالزمن ... و ان كل شئ له دليل علمى لابد ان يتم تصديقه عوضا عن الخرافة ...

تقدر تقول ان بعد كل القصة دى اقدر اقولك بأريحية اننا مينفعش منشوف كان فى اية فى الحضارات القديمة دى زمان و البحث وراها و بذل مزيد من الجهد و الفلوس عشان نعرف ممكن نستفيد بيها ازاى ... كان استوقفنى فىى مرة مخطوطة كنت جبتها من مكان عشوائى على الأنترنت و خدت منها صفحة عشوائية و كانت مخطوطة فى علم الصيدلة 

رغم عشوائية البحث بتاعى فى الجزئية دى الا انى اكتشفت ان فعلا فى استفادة عالية جدا من الورقة العشوائية دى ...

هنا بيتكلم عن علاج تقريبا بيعلاج التهابات المعدة ... و بيوصف هنا بعض مقادير بوزن 5 دراهم ... هنا انت بتلاقى الحقيقة كذا استفادة ... و هى انك لو صيدلى فممكن تفهم بعد شوية ابحاث عن اسماء المكونات دى فى عصرنا الحالى و تستخدم كعلاج طبيعى من الأعشاب لعلاج التهابات المعدة بدلا من الأدوية الكيماوية المعقدة المنتشرة ... صحيح ان لها فائدة ... و لكن هذه ايضا ليست عديمة الفائدة ... غير ان المقادير اللى بيقولها بوزن 5 دراهم اكيد قصده الدراهم اللى فى عهده هو ... فنلاقى هنا اهمية كبيرة للاثار حتى و ان كانت بعض العملات المعدنية و انى الاقى حاجه سليمة زى دى من الدراهم مكسب كبير جدا فى انى افهم المقادير اللى يقصدها اللى بالمناسبة قد تكون بمثابة اهمية المكونات ... انت لو تعرف المكونات و متعرفش المقادير كأنك معرفتش حاجه ... المقادير مهمة جدا ... و بتتطلب الكثير من الوقت و التجربة ... و ده فى اى صناعة مش فى الدواء بس ... فكونك عرفت توصل بأى طريقة لوزن الدرهم سواء عن طريق كتابات او حسابات او حتى انك تلاقى الدرهم نفسه فده مكسب كبير هيفهمك مخطوطة فى الصيدلة و ده شئ انت مكنتش تتخيله اصلا بمجرد اكتشافك للدرهم ... ده طبعا على افتراضية اننا منعرفش وزنه و العلاج ده مش معانا ... بس ده توضيح بسيط جدا لأهمية الاثار و اهمية العلوم التاريخية اللى ممكن محدش يتخيل انها ممكن فعلا تتسبب فى انقاذ حياة بنى ادم ... مش مجرد اكتشافات بسيطة و بدائية من علومنا الحالية و لكن الايام اثبتت ان مازالت الصيدلة فيها بعض التقدم لم نصل ليه فى عصرنا الحالى رغم روعة علوم الصيدلة فى ايدنا و اننا فعلا متقدمين فيها فى العصر ده عن عصور كتير و لكن ينقصها ايضا الكثير ... و اكبر مثال على كده التحنيط مثلا اللى بيتتطلب معرفة طبية و صيدلية فى بعض خصائصه ...

اللى حابب اوضحه ان فى كتابات قديمة غيرت الدنيا و غيرت فهمنا لما هو موجود بين ايدينا ... بعض هذه الكتابات عرفناها و انتشرت بين الناس لحد انهرده و بعضها الاخر ادفن وسط الاثار القديمة ... من ذلك مثلا حجر رشيد ... حجر رشيد كان مرسوم ملكى مكانش حد يتخيل فى يوم من الايام انه هيكون احد اكبر الاسباب فى فهم اللغة الهيروغليفية و اكتشاف خباياها و السعى وراء كنوزها اللى بنجنى منها حاليا الكثير من المال ... سواء عن طريق عرضها فى المتاحف او عن طريق السياحة مثلا ... غير انها ممكن تتسبب فى طفرة كبيرة جدا فى العلم اذا ما وجدنا كتابات توضح كيف تم بناء الهرم و كيف تم التحنيط و كيف تم بناء المسلات و المعابد و طبعا زى ما قولنا ... هل فعلا كان فى كهربا و لا لأ ... الله اعلم ... كل دى فرضيات ممكن تموت او تكبر بمجرد ايجاد نص صريح يوصف الحاجه دى ... ساعتها اكتشاف قد يكون فى عصر بالنسبة لكثير من الناس هو حجر كنا ممكن نحطه فى وسط طوب كتير و نبنى بيه بيت عادى ... لكن اللى مش عادى اننا نكتشف كل ده بسبب الحجر ده ... و كنت كتبت بوست صغير على الفيسبوك يذكر فيه بعض الكتب اللى تم الاعتماد فيها على علوم قديمة للأستفادة بيها ... لينك البوست من بروفايلى

كان منها مثلا كتاب الأمير اللى غير السياسة العالمية الحالية التى نعيشها الى الان ...

فمن كذلك يتبين لنا الاستفادة الاتية :

1- الصرف على البحث العلمى شئ فى منتهى الأهمية 

2- الصرف على الاستكشافات الاثرية مهم و ممكن ينقذ حياة بنى ادم

3- يجب البحث فى التاريخ و قراءته و البحث عما يمكن الاستفادة به من تجارب الماضى و لا سيما العلمية منها كما حدث فى موضوع قناة السويس 

4- العناية بالاثار و معرفة قيمتها و التوعية بذلك بالطرق العلمية و ليس لأن شكلها فقط فى منتهى الجمال 

5- البحث وراء المجهول و معرفته و دراسته فقد يكون مفيدا يوما ما و انت لا تدرى

6- ضرورة نشر الثقافة الشخصية و الوطنية بالخارج لعدم ضياع المجهود و التراث و الحضارة

7- الحث على المثابرة و السعى مرارا و تكرارا 

8- الخيال العلمى شئ مهم جدا و ملهم للتفكير و التطوير و ليس شئ عبثيا دائما

9- الأخذ بيد كل من يملك فكرة اختراع و دعمه و توفير المزيد من التحفيذ لظهور امثاله 

10- لا يوجد عذر لعدم صنع اختراع بين يدينا تصميمه قد يسهل حياتنا جميعا

11- يمكن ابتكار فكرة او ختراع لا يستخدم فى عصرك الحالى و انما بعدك بمئات السنوات كما حدث فى الكهرباء فلا تستصغر شيئا ... فالعلماء ورثة الأنبياء و انت تترك علم ينتفع به 

هذا ما انا وجدته فى كل هذه السطور بالدليل المقنع و لا اعتقد ان احد يحب العلوم و لم يكن يوما ما يفكر فى التاريخ سيجد ان هذا الكلام غير مقنع بالنسبة ليه و بعتقد انه فورا هيعشق التاريخ و الاثار و يشجع عليهم ... 

هذا و الله اعلم

متنسوش تناقشونى يا جماعة فى كل ده ... مستنيدكم